Niderland və Belçika rus diplomatlarını ölkədən çıxardıqlarını elan ediblər. Bu haqda hər iki ölkənin Xarici işlər nazirləri məlumat yayıb. Niderlandın Xarici işlər naziri Vopke Hukstranın tvitterdə yaydığı məlumatda qeyd edib ki, bu kəşfiyyatçılar ölkənin təhlükəsizliyinə təhdiddir:
Diplomatik ad altında Niderlanddakı Rusiya nümayəndəliklərində işləyən 17 rus kəşfiyyatçısı ölkədən çıxarılır.
Vopke Hukstra
Belçikanın Xarici işlər naziri Sofi Vilmes də bənzər açıqlama ilə 21 diplomatı geri göndərdiklərini deyib:
Belçika 21 rusiyalı diplomatı casusluq və ya ölkənin təhlükəsizliyini təhlükə altına qoyduqları üçün çıxarır.
Sofi Vilmes
Qeyd olunub ki, həmin şəxslər Belçikadan 15 gün ərzində ərazini tərk etməlidir.
Rus diplomatların çıxarılması: Son həftələr ABŞ və onun NATO müttəfiqləri onlarla rus diplomatı ölkədən çıxarıb. Vaşinqton BMT-dəki daimi nümayəndəliyinin 12 əməkdaşını persona non-qrata elan edib, Polşa 45 rus diplomatını casusluqda şübhəli bilərək ölkə ərazisindən çıxarıb.
