Ermənistan Azərbaycanla dərhal sülh danışıqlarına başlamaq istədiyini bəyan edib. Ermənistan Təhlükəsizlik Şurasının bununla bağlı bəyanatı hökumətin teleqram kanalında yayımlanıb:
Mövcud vəziyyətdə Təhlükəsizlik Şurası Ermənistanın əvvəlki mövqeyinin təsdiqini zəruri hesab edir və Azərbaycanı hərtərəfli sülh müqaviləsi üzrə dərhal danışıqlara başlamağa dəvət edir.
Ermənistan Təhlükəsizlik Şurası
Təhlükəsizlik Şurası onu da əlavə edib ki, regionda yeni hərbi eskalasiyanın qarşısını almaq üçün beynəlxalq çəkindirmə mexanizmlərindən istifadə etmək lazımdır.
Sülh danışığı haqqında: Martın 12-də Azərbaycan XİN-i iki ölkə arasında sülh müqaviləsinin imzalanması üçün Ermənistana beş maddədən ibarət təklif verib:
- suverenlik, ərazi bütövlüyü, beynəlxalq sərhədlərin qarşılıqlı tanınması;
- qarşılıqlı ərazi iddialarından əl çəkilməsi;
- beynəlxalq münasibətlərdə bir-birinin təhlükəsizliyinə zərər verəcək təhdidlərə son qoyulması;
- sərhədlərin yenidən müəyyənləşdirilməsi və diplomatik münasibətlərin qurulması,
- nəqliyyat və kommunikasiya xətlərinin açılması.
1 aydır Qarabağda nə baş verir: 2-12 mart tarixlərində Azərbaycan MN-nin yaydığı məlumatlara görə, Goranboy, Ağam, Tərtər, Xocalı və Naxçıvan Muxtar Respublikasında yerləşən mövqeləri ayrı-ayrı vaxtlarda müxtəlif növ silahlardan atəşə tutulub. Ermənistan atəşkəs pozuntuları nəticəsində Dağlıq Qarabağda ermənilərin yaşadığı kəndin bombalandığını deyib.
Ötən həftə Yerevan Azərbaycan tərəfini təmas xəttini pozmaqda ittiham edib, Bakı isə Ermənistanın qanunsuz hərbi birləşmələrinin təxribat törətməyə cəhd etdiyini bildirib. Azərbaycan MN Xocalı rayonunun Fərrux kəndi Azərbaycanın tam nəzarətinə keçdiyini açıqlayıb.
