Hərbi xidmətdə olan jurnalist Fərid İsmayıl xidmət etdiyi hərbi hissədəki özbaşınalıqlardan, çatışmazlıqlardan yazıb. Bu haqda şəxsi feysbuk hesabında yazan İsmayılov bildirib ki, hərbi hissə rəhbərliyinin məsuliyyətsizliyi ucbatından sağlamlığına ciddi ziyan dəyib. O, əlavə edib ki, xidmət etdiyi hissədə generator, içməli su və qida problemi aylardır həll edilmir:
Pul almadıqları əsgərlər postlarda, pul verməyən əsgərlər ac-susuz vəziyyətdə düşmənlə üz-üzə dayanır. Çavuş heyəti öz maaşından əsgərlər üçün qida alıb gətirir ki, xəstəlik yaranmasın. Hərbi hissə rəhbərliyi odun göndərmir, amma əsgər, çavuş heyəti minalanmış ərazidən odun toplayır. Bölməmim komandiri yuxarı komandanlığa problemləri, onların həll yollarını çatdırır, fayda isə yoxdur!
deyə vurğulayıb
Fərid İsmayılov deyir, məzuniyyətdə olduğu dövrdə onunla əlaqə saxlayan Dövlət Təhlükəsizliyi Xidməti, Hərbi Prokurorluq, Müdafiə Nazirliyinin əməkdaşlarına problemlər barədə məlumat versə də, 1 ay ərzində heç biri həll olunmayıb:
Cənab prezident, DTX gəlsin xidmət etdiyim hərbi hissəni araşdırsın. Cənab prezident, özünüz deyirsiniz ki, Azərbaycanın güclü ordusu var. Bəli, var, kifayət qədər güclü ordudur. Amma bu ordunun əsgəri ilə maraqlanmırsınız. Bir dəfə hansısa posta gedib əsgərlə kontaktda olmamısınız. Siz ötən ilin avqustunda Qarabağa səfər edirdiniz deyə 2000-ə yaxın şəxsi heyət susuz qaldı. İçməli su gətirilmədi ki, yoldan prezident keçəcək.
sözlərini əlavə edib.
İsmayılov vurğulayıb ki, qarşılaşdığı problemləri nə vaxt dilə gətirirsə, xidmət etdiyi bölmənin komandiri, münasibəti olan zabit heyəti danlanılır.
Müdafiə Nazirliyi jurnalistin iddialarına cavab verib: Nazirliyin açıqlamasında qeyd olunub ki, hərbi qulluqçunun səsləndirdiyi fikirlər yalandır, əsassızdır. Bu kimi qeyri- adekvat çıxışlar ordunun nüfuzuna xələl gətirmək istəyən qüvvələrin məqsədlərinə xidmət edir.
