Bu gün ərzində Avropa ölkələrindən ümumilikdə 100-dən çox rus diplomatı geri göndərilib. “RİA Novosti”nin məlumatına görə, İsveç, Danimarka, İtaliya, İspaniyadan sonra Estoniya və Latviya da Rusiya diplomatlarını öz ölkəsindən qovub.
Latviyanın xarici işlər naziri Edqars Rinkeviç Rusiyanın Liepaja və Dauqavpilsdəki baş konsulluğun bağlanacağını və 13 diplomatın ölkədən qovulacağını bəyan edib. Estoniyanın Xarici İşlər Nazirliyi isə Rusiyanın Narvadakı baş konsulluğun, Tartudakı konsulluq departamentinin ofisinin bağlandığını və 14 əməkdaşın ölkədən çıxarılacağını açıqlayıb.
Hansı ölkə neçə diplomatı geri göndərir: İsveç 3, Danimarka 15, İspaniya 25, İtaliya 30, Almaniya 40 rusiyalını persona non-qrata elan edib. Fransa 30-a yaxın şəxsi deportasiya etməyi planlaşdırır. Rusiya səfiri Fransa XİN-ə çağırılıb və ona persona non-qrata elan edilən əməkdaşların siyahısı verilib.
Ötən həftələrdə Polşa 45, Niderland 17, Belçika isə 21 rus diplomatı casusluqda ittiham edərək ölkədən qovub. ABŞ və onun NATO müttəfiqləri onlarla rus diplomatı ölkədən çıxarıb, Vaşinqton BMT-dəki daimi nümayəndəliyinin 12 əməkdaşını persona non-qrata elan edib.
