Naxçıvanda şəxsi avtomobil təmiri emalatxanası və yağdəyişmə servislərinin fəaliyyətinə qadağa qoyulub. “Gündəlik Naxçıvan”ın məlumatında qeyd olunub ki, sahibkarlardan özlərinə məxsus yeri bağlayıb “NAZ – Lifan” servislərində yer icarə götürmələri, ya da servisdə az maaşa işləmələri tələb edilib. Şikayətçilər isə “NAZ – Lifan” servisində kirayə haqqının baha olduğunu vurğulayırlar.
Şərur rayon sakini Sevindik Quliyev 35 ildir özünün yağdəyişmə servisi olduğunu, lakin bir müddət əvvəl rayon icra hakimiyyəti nümayəndəsinin ondan obyekti bağlamağı tələb etdiyini bildirir:
İcra başçısının müavini İmran Həsənov gəlib dedi ki, yuxarıdan tapşırıq var, bütün avtomobil təmiri və yağdəyişmə yerləri “NAZ – Lifan” servisinə köçürülməlidir. Aylıq kirayə pulu 700 manatdır. İndi bir aydan çoxdur işsizəm.
deyir Sevindik Quliyev
Quliyevin sözlərinə görə, bir neçə ildir fəaliyyətə başlayan “NAZ – Lifan” servislərində xidmət bahadır deyə müştəri olmur. Şəxsi servisləri bağlatmaqla hamını “NAZ – Lifan”ın xidmətlərindən yararlanmağa məcbur edirlər.
Təhlükəsizliyinə görə adının çəkilməsini istəməyən digər Naxçıvan sakini də bənzər problemlə üzləşdiyini bildirir:
Gəlib deyirlər, öz yerini bağlamalısan. “NAZ-Lifan” servislərində 300 manat maaşa gündə 10-12 saat işləməyimi istəyirlər. Mən sənətkar adamam. Elə olub ki, 300 manatı öz yerimdə bir günə qazanmışam. İndi məni istismar etmək istəyirlər.
şikayətçi bildirir
Onun sözlərinə görə, 25 ildən çoxdur öz obyektində avtomobil təmiri ilə məşğuldur, əlindən başqa iş gəlmir.
“NAZ- Lifan” markası nə vaxt yaranıb: Naxçıvan Avtomobil Zavodu (NAZ) 2010-cu ildən bəri eyni adlı müxtəlif avtomobil markaları istehsal edib. “NAZ – Lifan” brendinin rəsmi nümayəndəliyi “Cahan Motors”, “Cahan Holdinq” şirkətlər qrupuna daxildir. “Cahan Holdinq”in yerli hakim ailə Talıbovların nəzarəti altında olduğu bildirilir.
