Dövlət Təhlükəsizliyi Xidmətinin keçirdiyi xüsusi əməliyyatla həbs olunan İmişli rayon İcra Hakimiyyətinin eks-başçısı Vilyam Hacıyevin və ailə üzvlərinin əmlaklarına həbs qoyulub. APA-nın məlumatına görə, məhkəmə 5 milyon manatlıq əmlakların dövlət xeyrinə müsadirə edilib-edilməməsinə qərar verəcək.
Hansı əmlaklar müsadirə olunub:
- Bakı şəhərində mənzil;
- Abşeron rayonu, Xırdalan şəhərində yerləşən 4 mənzil;
- Sabunçu rayonu, Nardaran qəsəbəsində bağ evi;
- Ailəyə məxsus 3 avtomobil;
- Vilyam Hacıyevin oğlu Məhəmməd Hacıyevin “Range Rover” markalı avtomobil.
Vilyam Hacıyev niyə həbs olunub: Sabiq icra başçısı 2020-ci ilin mayında DTX-nın keçirdiyi əməliyyatla saxlanılıb. O, külli miqdarda mənimsəmə, vəzifə səlahiyyətlərindən sui-istifadə, rüşvət alma, vəzifə saxtakarlığı və qanunsuz silah saxlama maddələri ilə ittiham olunur. Cinayət işi üzrə araşdırma Bakı Ağır Cinayətlər Məhkəməsində davam etdirilir.
