LGBT fəallarının 2021-ci ilin iyulunda Tbilisidə keçirdiyi qürur yürüşündə ən azı 53 media işçisinə və digər şəxslərə hücum edən 20 radikal sağçı fəalın məhkəmə prosesi baş tutub. OC Medianın məlumatında bildirilir ki, aprelin 4-də yekunlaşan məhkəmədə Tbilisi Şəhər Məhkəməsi 19 nəfərin 1 ildən 5 ilədək azadlıqdan məhrum edilməsinə, bir nəfərin cərimələnməsinə qərar verib.
İttiham olunanların cəzaları
İlk məhkəmə iclasında 7 nəfər Mtavari Arkhi, Formula, İmedi, Tabula, Azadlıq Radiosu və Rustavi-2 telekanallarının jurnalistlərinə, həmçinin operatorlarına qarşı zorakılıq aktını təşkil etməkdə ittiham olunub. Onlardan 4-ü 1il 3 ay, digər 2-si isə 1il 2 ay müddətinə azadlıqdan məhrum edilib. İttiham olunan digər şəxslər isə 5000 lari (1600 ABŞ dolları) məbləğində cərimələnərək sərbəst buraxılıblar.
Gün ərzində keçirilən ikinci iclasda daha 7 nəfər 1 ildən 3 ilədək azadlıqdan məhrum edilib, 6 nəfər isə ötən ildən həbsdə olduqları üçün bundan sonra cəmi 6 ay həbsdə qalacaqlar.
Üçüncü və sonuncu iclasda təqsirləndirilən 6 şəxs Pirveli televiziyasının müxbiri Miranda Baqaturiya və iğtişaşlar zamanı ölən operator Aleksandr (Lekso) Laşkaravaya hücum etdikləri üçün 5 il müddətinə azadlıqdan məhrum edilib.
Təqsirləndirilən şəxslər iğtişaşlar zamanı heç kimə hücum etmədiklərini iddia edərək öz təqsirlərini boynuna almayıblar. Alt İnfo radikal qruplaşmasının rəhbərlik etdiyi zorakı hücumların təşkilatçılarından heç birinə qarşı ittiham irəli sürülməyib.
Qərara etiraz
Məhkəmənin qərarına etiraz edən radikal sağçı və Alt İnfo qrupunun yüzlərlə tərəfdarı Tbilisi Şəhər Məhkəməsinin qarşısına toplaşıb. Polis iğtişaş yaranmasının qarşısını almaq üçün ərazidə nəzarəti gücləndirib, media işçiləri və etirazçılar arasında canlı sədd qurub.
5 iyul yürüşündə nələr yaşanıb: LGBT fəalları paytaxtda qürur yürüşü keçirərkən minlərlə radikal sağçı fəal küçələrə axışaraq jurnalistlərə və aksiyadakı digər insanlara hücum ediblər. Baş verən iğtişaşlar zamanı ən azı 53 media işçisi yaralanıb. Pirveli televiziyasının müxbiri Miranda Baqaturiya və operator Aleksandr (Lekso) Laşkarava ciddi xəsarətlər alıb. Hücuma məruz qalan operatorun üz sümükləri qırılıb, beyin silkələnməsi olub. O, bir həftə sonra dünyasını dəyişib. 6 ay sonra açıqlanan rəsmi ekspertizada Laşkaravanın həddindən artıq dozada heroindən öldüyü iddia edilib.
