Avropa İnsan Haqları Məhkəməsi jurnalist Eynulla Fətullayevin Azərbaycan hökuməti ilə bağlı şikayəti barədə qərar çıxarıb. Məhkəmə jurnalistin vəkillərinin iddia etdikləri pozuntuların əksəriyyətini tanıyıb.
Məhkəmə hansı qərarı çıxarıb: Avropa Məhkəməsi dövlətin Konvensiyanın 34-cü maddəsi ilə üzərinə götürdüyü öhdəliklərə əməl etmədiyini vurğulayıb. Hesab edilib ki, Eynulla Fətullayevə münasibətdə Konvensiyanın 6-cı maddəsi pozulub- milli məhkəmələr ədalətsiz olub. Ona narkotik vasitənin üzərinə rəsmilər tərəfindən yerləşdirilməsi, cinayət işinin ümumilikdə qurama olması haqda dəlilləri təqdim edə bilmək imkanı verilməyib. Məhkəmənin qərarına əsasən, hökumət jurnalistə 4 min avro təzminat ödəməlidir.
Şikayətin motivi nə idi: Eynulla Fətullayev iddia edib ki, 2007-ci ildə həbs edilərkən ona qarşı irəli sürülən ittihamlar uydurma olub, narkotik maddə üzərinə rəsmilər tərəfindən yerləşdirilib. Onun fikrincə, bütün baş verənlər tənqidçi jurnalistika fəaliyyətinə görə olub.
2007-ci ildə nə baş vermişdi: Jurnalist böhtan, terrorizm hədəsi, etnik düşmənçiliyin qızışdırılması və vergidən yayınma ittihamları əsasında iki cinayət işi üzrə təqsirli hesab olunaraq 8 il 6 ay müddətinə azadlıqdan məhrum edilmişdi. Həbsdə olarkən isə üzərində axtarış aparılaraq heroin tapıldığına görə, 2 il 6 ay müddətinə azadlıqdan məhrum olunmuşdu.
