Prezident İlham Əliyev Elman Rüstəmovun Mərkəzi Bankın İdarə Heyətinin üzvlüyündən azad edilməsi, onun əvəzinə Taleh Kazımovun təyin edilməsi haqqında təqdimat çıxarıb. “Report” yazır ki, Milli Məclisin İqtisadi siyasət, sənaye və sahibkarlıq komitəsinin iclasında prezidentin təqdimatları müzakirə edilib.
Bildirilib ki, İqtisadi siyasət, sənaye və sahibkarlıq komitəsi hər iki təqdimata müsbət rəy verərək Milli Məclisin plenar iclasında müzakirə edilməsini tövsiyə edib.
Üzvlükdən çıxarılsa nə olacaq: 70 yaşlı Elman Rüstəmov 1995-ci ildən Mərkəzi Bankın rəhbəridir. Əgər MB-nin İdarə Heyətinin üzvlüyündən çıxarılsa, həm də bankın sədrliyindən azad olunacaq.
Taleh Kazımov kimdir: 38 yaşlı Kazımov 2007-ci ildə “PAŞA Bank”da Risklərin idarəedilməsi departamentinin meneceri, daha sonra Xəzinədarlıq və pul bazarı departamentinin direktoru olub. 2011-ci ilin dekabrından “PAŞA Bank”ın İdarə heyətinin üzvü, 2015-ci ildən isə bankın İdarə heyətinin sədri və baş icraçı direktoru vəzifəsinə təyin edilib.
