Naxçıvan sakinləri Sədərək gömrük məntəqəsinin Türkiyəyə getmək istəyənlərə bir neçə gündür yeni qayda tətbiq etməyə başladığını iddia edirlər. Yerli sakinlərin “Gündəlik Naxçıvan”a verdiyi məlumata görə, gömrükdən keçən hər bir şəxs əlində minimum 40 dəstə göyərti aparmalıdır. Əgər şəxs qonşu ölkəyə avtomobillə gedirsə, göyərti dəstə ilə yox, kilo ilə hesablanır- hər avtomobil 40 kilo götürməlidir.
Bildirilir ki, bu qaydaya əməl etməyənlər, sərhəddən buraxılmır. Şikayətçilər deyir, göyərtilər Türkiyəyə keçmək istəyənlərə Sədərək gömrüyünün qapısında paylanılır. Bu prosesə Naxçıvan Ali Məclisinin Qəbul Şöbəsinin rəhbəri Rəşad Babayevin rəhbərlik etdiyi deyilir. Taksi sürücüsü kimi çalışan Kəngərli rayon sakini Niyaz Mahmudov gömrükdən keçirilən göyərtilərin Rəşad Babayevin adamları tərəfindən Türkiyədə təhvil alınıb böyük maşınlara yükləndiyini deyir:
Ötən illər yük maşınları ilə bir dəfəyə tonlarla göy aparıb müxtəlif şəhərlərdə satırdılar. Bu il Türkiyə tərəfi göyərti üçün 40 kiloya kimi məhdudiyyət qoyub. Bunlar da hiyləyə əl ataraq mallarını bizim əlimizlə keçirirlər.
deyə bildirir
Mahmudovun sözlərinə görə, gömrükdə şərt kəsirlər ki, ya 40 kilo göyərti aparmalıdırlar, ya da Türkiyəyə buraxılmayacaqlar:
Mən avtomobillə gedirəm ki, sərnişin daşıyıb ailəmi saxlamaq üçün çörəkpulu çıxarım. Məcbur olub müştərinin birini düşürüb, onların göyərtisini aparırıq. Müştəri itirdiyimə görə, hər dəfə ən az 30-50 manat arası ziyana düşürəm.
deyib taksi sürücüsü
“Gündəlik Naxçıvan” məsələyə münasibət öyrənmək üçün Sədərək Gömrük İdarəsi ilə əlaqə saxlayıb. İdarədən Türkiyəyə aparmaq üçün sakinlərə göyərti təklif edildiyini təsdiqsələr də, bunun məcburi olmadığını bildiriblər. Naxçıvan MR Ali Məclisindən isə münasibət öyrənmək mümkün olmayıb.
