“PAŞA Bank”ın İdarə heyətinin sədri və baş icraçı direktoru Taleh Kazımov Mərkəzi Bankının sədri təyin edilib. Bununla bağlı prezident İlham Əliyev sərəncam imzalayıb.
Qeyd edək ki, ötən gün İlham Əliyev Elman Rüstəmovun Mərkəzi Bankın İdarə Heyətinin üzvlüyündən azad edilməsi, onun əvəzinə Taleh Kazımovun təyin edilməsi haqqında təqdimat çıxarmışdı. Bu təqdimat Milli Məclisdə səsverməyə çıxarılaraq qəbul edilmişdi.
38 yaşlı Taleh Kazımov haqqında bildiklərimiz bunlardır:
İş fəaliyyəti
- 2004-2006-cı illərdə “Bank Standard”da Maliyyə və mühasibat uçotu idarəsinin Xəzinədarlıq və fondlar şöbəsində mütəxəssis, Maliyyə nəzarəti departamentinin İdarəetmə və büdcə planlaşması şöbəsində, daha sonra isə Kredit siyasəti departamentinin Korporativ müştərilərin kreditləşmə şöbəsində aparıcı mütəxəssis işləyib.
- 2007-ci ildə “PAŞA Bank”da Risklərin idarəedilməsi departamentinin meneceri vəzifəsində işləyib, daha sonra Bankın Xəzinədarlıq və pul bazarı departamentinin direktoru vəzifəsini tutub.
- 2011-ci ildə “PAŞA Bank”ın İdarə heyətinin üzvü seçilib.
- 2015-ci ildə “PAŞA Bank”ın İdarə heyətinin sədri və Baş icraçı direktoru vəzifəsinə təyin olunub.
Təhsil aldığı sahələr
- 2000–2004-cü illərdə Azərbaycan Texniki Universitetinin “Avtomatika və kompüter mühəndisliyi” fakültəsini bitirib.
- 2004–2006-cı illərdə isə Azərbaycan Dövlət Neft Akademiyasının ABŞ-ın “Georgia State University” ilə birgə proqramı çərçivəsində maliyyə ixtisası üzrə “Biznesin idarə edilməsi (MBA)” magistr dərəcəsi alıb.
- 2012-ci ildə “London Biznes Məktəbi”nin və 2014-cü ildə “Harvard Biznes Məktəbi”nin yüksək ixtisas proqramlarını bitirib.
