Dövlət Təhlükəsizlik Xidməti (DTX) və Mənzil İnşaatı Dövlət Agentliyi (MİDA) birgə məlumat yayaraq güzəştlə satış prosesinə müdaxilə edən şəxslərin saxlanıldığını bəyan ediblər. Məlumatda qeyd olunub ki, DTX ilkin araşdırmalar apararaq faktla bağlı Cinayət Məcəlləsinin 273.3.1 və 273.3.2-ci (qabaqcadan əlbir olan bir qrup şəxs tərəfindən kompüter sisteminə və kompüter məlumatlarına təkrar qanunsuz müdaxilə) maddələri ilə cinayət işinə başlayıb:
Müəyyən edilib ki, Azərbaycan vətəndaşları Məmmədov Elçin Elman oğlu, Hacıyev Ruslan Afiz oğlu, Hüseynov Firudin İlqar oğlu, Lətifzadə Yunis İltimas oğlu, Abdullayev Tərlan Tahir oğlu və Məmmədov Cavid Fəhrad oğlu digərləri ilə əlbir olub ayrı-ayrı qruplar halında MİDA-nın “Güzəştli mənzil” informasiya sisteminə daxil olmaq, oradakı məlumatları dəyişmək hüququ olmadan maddi maraq zəminində onlara müraciət etmiş şəxslərin güzəştli şərtlərlə mənzil əldə etmələrini təmin etmək məqsədilə xüsusi kompüter proqram təminatları hazırlayıblar.
deyə qeyd olunub
Qeyd olunub ki, adıçəkilən şəxslər martın 30-da “Güzəştli mənzil” informasiya sisteminə daxil olaraq kompüter məlumatlarını qəsdən təkrar dəyişdirib güzəştli mənzil əldə etmək imkanını məhdudlaşdırıblar.
MİDA-nın satışında nə baş vermişdi: Martın 30-da Yasamal Yaşayış Kompleksinin ikinci mərhələsində 442 mənzil satışa çıxarılmışdı. Satış vaxtı təxminən 9 minə yaxın insan müraciət edib, lakin “Güzəştli mənzil” informasiya sistemində problem yaşandığına görə mənzillər 4-5 saniyə ərzində satılıb. Hər il olduğu kimi bu il də satışdan sonra sosial şəbəkələrdə narazılıqlar, şikayətlər yayılıb.
