Neftçala Rayon İcra Hakimiyyətinin həbsdə olan sabiq başçısı İsmayıl Vəliyevin müsadirə edilən əmlaklarının tam siyahısı məlum olub. “Report” yazır ki, Lənkəran Ağır Cinayətlər Məhkəməsinin hökmünə əsasən, Vəliyevin 12 əmlakı dövlət xeyrinə xüsusi müsadirə olunub.
Hansı əmlaklar müsadirə olunub:
- Bakı şəhəri, Səbail rayonu, Mətbuat prospektində mənzil;
- Gəncə şəhəri, Nizami rayonu, Fətəli Xan Xoyski küçəsində fərdi yaşayış evi;
- Bakı şəhəri, Yasamal rayonu, Hüseyn Cavid prospektində qeyri-yaşayış sahəsi;
- Bakı şəhəri, Yasamal rayonu, Qurban Xəlilov küçəsində 3 mənzil;
- Qobustan rayonu, Mərəzə qəsəbəsi, Şikar Şikarov küçəsində 1 və 2 mərtəbəli, 6 otaqlı fərdi yaşayış evi;
- Qobustan rayonu, Xilmilli kəndində 3.69 ha torpaq sahəsində yerləşən əmlak kompleksi kimi müəssisə (Xırman binası);
- Qobustan rayonu, Mərəzə qəsəbəsində 7 girişli 1 mərtəbəli qeyri-yaşayış binası;
- “Neftçala Taxıl” ASC-nin xüsusi mülkiyyətində olan və Neftçala şəhəri, M.Ə.Sabir küçəsində əmlak kompleksi kimi müəssisə;
- Neftçala şəhəri, M.Ə.Sabir küçəsində “Yurdum” adlı ictimai iaşə obyekti;
- Neftçala şəhəri, M.Ə.Sabir küçəsində tikili.
İsmayıl Vəliyev niyə həbs edilib: Sabiq icra başçısı 2020-ci ilin fevralında DTX-nın keçirdiyi xüsusi əməliyyatla həbs edilərək təmir-tikinti, abadlıq işlərinə ayrılan dövlət vəsaitlərinin bir qismini mənimsəmək, vəzifə səlahiyyətlərindən sui-istifadə, rayon ərazisində torpaq sahələrinin özbaşına tutulması və həmin ərazilərdə qanunsuz tikinti işləri aparmaqda ittiham olunub. O, Lənkəran Ağır Cinayətlər Məhkəməsinin hökmü ilə 10 il müddətinə azadlıqdan məhrum edilib.
