Baş Prokurorluq “Tərtər işi” ilə bağlı yeni məlumat yayıb. Açıqlamada işgəncəyə məruz qalanların sayının artması, yeni həbs edilənlərin və ləğv edilən hökmlərin olduğu qeyd edilib.
Prokurorluğun məlumatında nələr deyilir:
- İşgəncəyə məruz qalan 280 yeni şəxs müəyyən edilərək zərərçəkmiş şəxs qismində tanınıb. Əvvəlki istintaq zamanı zərərçəkmiş kimi tanınan şəxslərlə birlikdə hal-hazıradək ümumilikdə 397 zərərçəkmiş şəxs müəyyən olunub.
- Hərbi qulluqçulara işgəncə verməsi, vəzifə səlahiyyətlərini aşmasına əsaslı şübhələr müəyyən edilən daha 7 nəfər – Niftəliyev Rəşid Ağaşərif oğlu, Mikayılov Ruslan Məhəmmədəli oğlu, Maşıyev Sənan Səxavət oğlu, Qəhrəmanov Cabir Babaxan oğlu, Əzizov Polad Seyfəddin oğlu, Əliyev Elçin Kalam oğlu və Məmmədov İntiqam Şərif oğlu barəsində həbs qətimkan tədbiri seçilib.
- Barəsində həbs qətimkan tədbiri seçilən Əzizov Polad Seyfəddin oğlu istintaqdan gizləndiyi üçün axtarışa verilib.
- Dövlətə xəyanət ittihamı ilə barələrində cinayət təqibi aparılan, sonradan bu hal öz təsdiqini tapmamaqla, hərbi xidmət əleyhinə olan cinayətlərə görə məhkum olunmuş 16 şəxs barəsində çıxarılan hökmlər ləğv edilib.
- Hazırda cəza çəkən Ağayev Fuad Ramiz oğlunun məhkum edildiyi hallardan başqa çoxsaylı zərərçəkmiş şəxslərə qarşı qanunsuz əməllərə yol verməsinə əsaslı şübhələr müəyyən edildiyindən Cinayət Məcəlləsinin 145.3, 293.2, 341.2.2, 341.2.3 və 128-ci maddələri ilə ittiham elan olunub.
Prokurorluğun məlumatında qeyd edilib ki, bu işlə əlaqədar işgəncəyə, fiziki və ya psixi təsirə, digər qanunsuzluqlara məruz qalsa da, zərərçəkmiş şəxs qismində tanınmayan şəxslər Baş Prokurorluğun “961” Çağrı Mərkəzi, 012-361-16-47 nömrəli telefon, habelə contact@prosecutor.gov.az elektron poçt ünvanı, eləcə də prokurorluğun sosial şəbəkələrdəki səhifələri (instagram, facebook, telegram, twitter) vasitəsilə əlaqə saxlasınlar.
“Tərtər işi” haqda nələri bilirik:
- 2017-ci ilin mayında Baş Prokurorluq, Müdafiə Nazirliyi, Daxili İşlər Nazirliyi və Dövlət Təhlükəsizliyi Xidməti bir qrup hərbi qulluqçu və mülki şəxslərin ölkəyə xəyanət etdikləri və Ermənistana məlumat ötürdükləri haqda bəyanat yayıb;
- Hadisə haqda ilk rəsmi məlumatı 2021-ci ilin oktyabrında Hərbi prokuror Xanlar Vəliyev verib. O, yalnız işgəncə verilən hərbçilərin sayını açıqlayaraq 102-103 nəfərə müxtəlif formada işgəncələr verildiyini, cinayət işi başlayanadək yalnız bir nəfərin öldüyünü deyib.
- Qeyri-rəsmi məlumatlara görə, “Tərtər işi”ndə 25 nəfər vətənə xəyanətdə təqsirləndirilib, 9 nəfər isə işgəncələr nəticəsində ölüb.
- İstintaqın qeyri-rəsmi olaraq “Tərtər işi” adlandırılmasının səbəbi kütləvi işgəncələrin Tərtər rayonunun Şıxarx qəsəbəsində istismara yararsız və istifadə edilməyən 1-ci Ordu Korpusunun tabeliyində olan hərbi hissənin keçmiş Qərargahında baş verməsidir.
