Almaniya Ukrayna hərbçilərinə alman istehsalı olan ağır artilleriyadan istifadəyə dair təlim keçəcək. Adı açıqlanmayan hökumət rəsmisi “Bloomberg”ə bildirib ki, təlim Hollandiyanın Ukraynaya göndərdiyi özüyeriyən, sürətli atıcı artilleriya sistemi olan “PzH 2000” üçün nəzərdə tutulub. Nəşr qeyd edib ki, hazırda Ukraynada müharibə davam etdiyinə görə təlimlər Polşa və ya Almaniyada keçirilə bilər.
Rəsmilər Ukraynaya silah vermək haqda nə deyiblər:
- Almaniya kansleri Olaf Şolz Bundesverin ehtiyatlarından Ukraynaya silah tədarük etmək imkanları praktiki olaraq tükəndiyini deyib. O, Kiyevi ağır silahlarla təmin etməkdən danışmasa da, bildirib ki, alman istehsalçılarından Ukrayna tərəfinə birbaşa silah tədarükünü maliyyələşdirməyə kömək edəcəklər.
- Bundesver baş müfəttişinin müavini Markus Laubental Kiyevə ağır silahların verilməsi ehtimalını rədd edib. Onun sözlərinə görə, alman piyada döyüş maşını “Marder” Kiyevə göndərilsə, dəstəyə ehtiyac olarsa, Bundesverin NATO-nun Çevik Qüvvələri üçün heç nə qalmayacaq.
- Xarici işlər naziri Annalena Berbok Almaniyanın artilleriya təlimi və texniki xidmətinə kömək edəcəyini təsdiqləyib, lakin əlavə məlumat verməkdən imtina edib.
