Londonun Vestminster məhkəməsi “WikiLeaks”ın qurucusu Culian Assancın ABŞ-a ekstradisiyasına dair qərar çıxarıb. Bu haqda “WikiLeaks” tvitter hesabında məlumat yayılıb:
Böyük Britaniya hakimləri Culian Assancın ABŞ-a ekstradisiyasına qərar verib və onu 175 il həbs cəzası gözləyir.
qeyd olunub
Məhkəmə orderin verilməsi ilə bağlı qərarı aprelin 2-də verib. Jurnalistin ekstradisiyası ilə bağlı yekun qərarı Böyük Britaniyanın daxili işlər naziri Priti Patel verəcək. Assancın müdafiəsi mayın 18-dək məhkəmənin qərarına etiraz edə bilər.
Vestminster məhkəməsinin qərarından sonra Assancın tərəfdarları məhkəmə binasının qarşısında toplaşaraq ona azadlıq tələb ediblər. Tərəfdarlar hesab edirlər ki, 2 illik məhkəmə çəkişməsindən sonra jurnalistin taleyi yenidən siyasi qərarla müəyyənləşəcək.
Assanc kimdir: 50 yaşlı Culian Assanc minlərlə məxfi sənədin yayıldığı “WikiLeaks”ın əsasını qoyanlardan biridir. O, 2006-cı ildə bir sıra hökumətlər, ABŞ rəhbərliyinin fəaliyyəti barədə məxfi informasiyaları, Əfqanıstan və İraqda keçirilən hərbi əməliyyatlarda dinc əhalinin öldürülməsi, Quantanamo həbsxanasında məhkumların saxlanılma şəraiti barədə “WikiLeaks”da sənədlər yaymışdı.
Assanc necə həbs edilib: 2012-ci ildə Ekvadorun Londondakı səfirliyinə sığınan Assanc 7 il orada yaşasa da, 2019-cu il aprelin 11-də həbs edilib. Bundan sonra ABŞ Culian Assanca qarşı casusluq və məxfi informasiyanın yayılması ilə bağlı ittihamlar irəli sürüb. O, ABŞ-a ekstradisiya olunarsa, 175 il həbs cəzası alacaq.
