Naxçıvanın Culfa rayonunda dövlət büdcəsindən maliyyələşən idarə və təşkilatların işçiləri onlardan hərbi sahəyə yardım adı ilə pul yığıldığını iddia ediblər. Şikayətçilər “Gündəlik Naxçıvan”a bildiriblər ki, hər ay onların maaşlarından 10 manat pul tutulur və buna rayon icra başçısının müavinləri rəhbərlik edirlər. Dövlət idarələrinin birində çalışan Zamin Seyidov deyir, etiraz edənlər işdən çıxarılmaqla hədələnirlər:
Bizdən hər ay hərbiyə yardım adı ilə topladıqları pulları ciblərinə qoyurlar. Maaşımız onsuz da çox azdır, bir aydan o biri aya yetmir. Pulu vermək istəməyəni işdən qovmaqla hədələyirlər. Hər ay maaş vaxtı icra hakiminin müavini başımızın üstün kəsdirib hədələyir. Deyirlər, yuxarıdan tapşırıq belədir. Biz inanırıq ki, yuxarının bundan xəbəri yoxdur.
deyə qeyd edir
Digər şikayətçi Səxavət Əliyevin sözlərinə görə, bununla bağlı Ali Məclisə şikayət etmək istəyənlər cəzalandırılır:
Ordunun bizim 5-10 manata ehtiyacı yoxdur axı. Bilirik ki, bizdən yığılan pullar ciblərə gedir. Bir neçə nəfər bununla bağlı icra başçısının özünə şikayət etmişdi. O isə qəzəblənib, şikayətçiləri işdən qovdu. İndi heç kim qorxudan səsini çıxara bilmir. Bütün idarələrə xəbərdarlıq edib ki, bununla bağlı Ali Məclisə şikayətə gedənlər daha ağır cəzalandırılacaqlar. Buna görə, qorxudan kimsə səsini çıxara bilmir.
bildirir
Culfa Rayon İcra Hakimiyyətinin nümayəndəsi məsələ ilə bağlı “Gündəlik Naxçıvan”a münasibət bildirərək iddialarının yalan olduğunu deyib, əlavə məlumat verməkdən imtina edib.
