Rusiya İstintaq Komitəsi jurnalist, “Nə? Harada? Nə zaman?” tele-oyunun keçmiş iştirakçısı, “Bakı” jurnalının piyar-direktoru Rövşən Əsgərova qarşı cinayət işi başladıb. Komitənin yaydığı məlumatda jurnalistin nasizmi təbliğ etdiyi qeyd edilib:
İstintaq Komitəsinin Baş İstintaq İdarəsi Rövşən Əsgərova qarşı nasizmin reabilitasiyası ilə bağlı başlanmış cinayət işini araşdırır. O, Rusiya Federasiyası Cinayət Məcəlləsinin 354.1 (nasizmin reabilitasiyası) maddəsi ilə ittiham edilir.
Rusiya İstintaq Komitəsi
Komitənin məlumatında vurğulanıb ki, şəxslərin statusundan və sosial vəziyyətindən asılı olmayaraq, Vətən müdafiəçilərinin xatirəsini ləkələmək və ya alçaltmaq cəhdlərinə sərt cavab veriləcək.
Jurnalist nəyə görə ittiham edilir: “Absaz” nəşrinin iddiasına görə, Əsgərov öz feysbuk hesabındakı paylaşımda rus sərkərdəsi, Sovet Marşalı Georgi Jukovu “təcrübəli talançı”, “formalı qatil” və Almaniyadan qiymətli əşyaları oğurlayan şəxs, Dövlət Tarix Muzeyini isə “psevdotarixi” adlandırılıb. İstintaq Komitəsi bunu marşalın xatirəsinə təhqir və onu gözdən salan yalan məlumat hesab edib.
