Türkiyənin xarici işlər naziri Mövlud Çavuşoğlu Ermənistanla 3-cü görüşdə qarşıdakı dövrdə atılacaq müxtəlif addımların müzakirə olunacağını deyib. Nazirin sözlərinə görə, iki ölkə arasında sərhədin yenidən müəyyən edilməsi ilə bağlı razılaşma var:
Razılaşma var idi ki, demarkasiya yenidən aparılsın. Bu necə həyata keçiriləcək? Məsələn, birgə komissiya yaradılacaqmı?
deyə bildirib
Çavuşoğlu xatırladıb ki, analoji razılaşma Ermənistanla Azərbaycan arasında da olub və onlar birgə komissiya yaratmaq qərarına gəliblər.
Məsələyə Ermənistan tərəfi nə deyib: Mövlud Çavuşoğlunun açıqlamasında sonra Ermənistan tərəfi məlumatı təkzib edib. XİN-in mətbuat katibi Vahan Unanyan bildirib ki, Ermənistan və Türkiyə arasında yenidən delimitasiya ilə bağlı heç bir müzakirə və ya razılaşma yoxdur. Ümumiyyətlə, gündəlikdə belə bir məsələ yoxdur.
Türkiyə-Ermənistan münasibəti necə normallaşıb: 2009-cu ildə diplomatik əlaqəni kəsən hər 2 ölkə 2021-ci ilin sonunda nümayəndələr təyin ediblər. Ankaranı Türkiyənin ABŞ-dakı keçmiş səfiri Sərdar Kılıç, Ermənistanı isə parlamentin sədr müavini Ruben Rubinyan təmsil edib.
Görüşlər harada baş tutub: Sərdar Kılıçla Ruben Rubinyan ilk dəfə yanvarın 14-də Moskvada görüşüblər. Daha sonra isə fevralın 22-də Vyanada bir araya gəliblər. Xüsusi nümayəndlərin üçüncü görüşü də yenidən Vyanada mayın 3-də keçiriləcək.
