8 mayda jurnalist Aytən Məmmədova yaşadığı binanın liftinə daxil olan vaxt naməlum şəxsin hücumuna məruz qalıb. Hücum edən şəxs onun boğazına bıçaq dirəyib və “sən ağıllanmadın?” deyib. Jurnalistin sözlərinə görə həmin şəxs adını çəkmədiyi məhkəmə işinə görə hədələyib, yazmağı dayandırmağı tələb edib.
Hücum edən haqda bildiklərimiz: A. Məmmədovanın sözlərinə görə hücum edən şəxs ortayaşlı bir kişi olub. Jurnalist ehtimal edir ki, 10 yaşlı Nərmin Quliyevanın öldürülməsi barədə açılan cinayət işi haqda məhkəmələrdən yazdığı yazılara görə təhdid edilir.
Polisin reaksiyası: Jurnalist 9 mayda Bakı Şəhər Baş Polis İdarəsinə (BŞBPİ) dəvət olunub. Ona bildirilib ki, işin araşdırılması istiqamətində müəyyən addımlar atılıb və araşdırma davam edir.
Cinayət işi açılıbmı? Açılıb. Cinayət Məcəlləsinin 134-cü (Öldürməklə və ya sağlamlığa ağır zərər vurmaqla hədələmə) maddəsi ilə Binəqədi Rayon Polis İdarəsinin İstintaq şöbəsində cinayət işi başlanıb. DİN-in Mətbuat Xidmətindən Elşad Hacıyev “Fecbook”da açıqlama yayıb ki, hazırda cinayət işi üzrə zəruri əməliyyat-axtarış, əməliyyat-istintaq hərəkətləri davam etdirilir.
Media İnkişaf Agentliyinin mövqeyi: MEDİA jurnalistin hücuma məruz qalması ilə bağlı açıqlama yayıb. Bildirilib ki, A Məmmədova ilə əlaqə saxlanılıb, onun vəziyyəti barədə ətraflı məlumat əldə olunub. Sitat: Medianın İnkişafı Agentliyi baş verən hadisəyə həssaslıqla yanaşır və diqqətdə saxlayır.
Nərmin Quliyevanın öldürülməsi haqda: 2019-cu ildə Tovuzun Dondar Quşçu kəndində itkin düşən 10 yaşlı N. Quliyevanın iki ay sonra cəsədi tapılır. Cəsədi tapan və polisə xəbər verən həmin kəndin sakini İlkin Süleymanov saxlanılır və cinayəti törətməkdə təqsirli bilinir. İ. Süleymanov və onun yaxınları bildirir ki, cinayəti onun boynuna götürməsi üçün günlərlə işgəncə verilib. A. Məmmədova həmin məhkəməni mütəmadi olaraq işıqlandıran jurnalistlərdən biridir.
İctimaiyyətin reaksiyası: Azərbaycanda olan jurnalistlər və hüquq müdafiəçiləri bəyanat yayaraq törədilən cinayət əməlinin düzgün araşdırılmasını və işin arxasında dayanan şəxslərin tapılıb cəzalandırılmasını tələb edib.
