Mayın 9-da ABŞ prezidenti Co Bayden Ukraynaya lend-liz əsasında silah tədarükü haqqında qanunu imzalayıb. Artıq Ukrayna ABŞ-dan qanuni məhdudiyyətlər olmadan, sürətli şəkildə müdafiə silahları, ərzaq yardımı, nəqliyyat ala biləcək. Bayden lend-liz qanununu qəbul etməklə ABŞ və dünya tarixində 81 əvvəlki mühüm addımı təkrarlamış oldu.
Qanun necə qəbul edilib: Aprelin 28-də ABŞ Konqresi, demək olar ki, yekdilliklə Ukraynaya kredit-icarə verilməsi haqqında qanun layihəsini qəbul edib. Lend-liz qanununu 417 deputat dəstəkləyib, yalnız 10 deputat əleyhinə çıxıb.
Lend-lizlə Ukrayna nələr alacaq:
- 3-cü nəsil M1A2 Abrams tankları;
- ABŞ-ın M2A3 Bradley piyada döyüş maşınları;
- Özüyeriyən M109A6 Paladin silahları;
- HIMARS buraxılış raket sistemləri;
- Universal başlatma qurğusu.
ABŞ-ın bu addımına Ukrayna tərəfi dərhal münasibət bildirib:
- Ukrayna Prezidenti Vladimir Zelenski Co Baydenə və ABŞ xalqına minnətdarlıq bildirib. Qanunun imzalanmasını tarixi addım adlandırıb.
- Prezident Ofisinin rəhbəri Andrey Yermak qanunun hərbçilərin sayını artırmağa imkan verdiyini, qələbənin daha da yaxınlaşdığını deyib.
Lend-liz qanunu haqda nələr bilirik: ABŞ Konqresi bu qanunu ilk dəfə 1941-ci ilin 11 martında qəbul edib. Qanun II Dünya Müharibəsi zamanı anti-Hitler koalisiyasını silah,ərzaq, tibbi avadanlıq və dərmanlar, strateji xammal, o cümlədən neft məhsulları ilə təmin etmək üçün qəbul edilmişdi. Bu qanun ABŞ-ın birbaşa müharibəyə girməməsinə icazə verib və 20 sentyabr 1945-ci ildə başa çatıb. 1941-ci il oktyabrın 1-də lend-liz bəzi şərtlərlə SSRİ-yə də şamil edilib. Ümumi olaraq ABŞ SSRİ-yə təxminən 11 milyard dollar dəyərində yardım yollayıb, bu məbləğin 2,37 milyardı ərzaq və digər mülki təyinatlı məhsullar olub.
