Ermənistanın baş naziri Nikol Paşinyan Niderland səfəri zamanı “Klingendayl” Beynəlxalq Münasibətlər İnstitutunda çıxış edərkən Azərbaycanla hazırkı münasibətə toxunub, Dağlıq Qarabağdakı son durum barədə danışıb. Çıxışı zamanı Paşinyanın Azərbaycanın Dağlıq Qarabağla bağlı mövqeyi haqda səsləndirdiyi fikirlərə Azərbaycan XİN cavab verib.
Paşinyan nələr iddia edib:
- 2020-ci il 9 noyabrda üçtərəfli bəyanat qəbul edildikdən sonra Azərbaycan Dağlıq Qarabağ probleminin həll olunduğunu bildirdi. Bu, təkcə siyasi bəyanat deyil, əslində Qarabağ münaqişəsinin həlli ilə bağlı Azərbaycanın fikirlərinin kulminasiya nöqtəsidir. Bu siyasəti bir cümlə ilə formalaşdırsaq, siyasət belədir: ermənisiz Qarabağ.
- Bu ilin yaz aylarında Azərbaycan ordusunun hərbçiləri Dağlıq Qarabağda erməni kəndlərinin yaxınlığında səsgücləndiricilər yerləşdirərək sakinləri evlərini tərk etməyə çağırıblar. Əks halda onları zorla çıxaracaqlarını deyiblər.
- Azərbaycan hərbçiləri gecələr güclü işıqlandırmalı fənərlərlə erməni kəndlərinin evlərinə işıq salırdılar, yüksək səslə azan oxudurdular. Bu, dini terrorizmin nümunəsidir.
- Bu ilin martında Dağlıq Qarabağda qar yağıb. Martın 8-dən də Azərbaycanın nəzarətində olan ərazidə Qarabağı qazla təmin edən kəmərdə partlayış baş verib. Təmir uzun çəkdi və təmirdən sonra Azərbaycan borunun üzərinə siyirtmə qoyub, ondan siyasi, mənəvi və sosial təzyiq vasitəsi kimi istifadə etməyə çalışıb.
- Bir müddət əvvəl Azərbaycanın Mədəniyyət Nazirliyi açıqlama yaydı ki, erməni kilsəsi hesab edilən abidələrin üzərindəki “saxta yazıları silmək üçün” işçi qrupu yaradılıb. Və bundan bir neçə ay əvvəl Azərbaycan prezidenti Azərbaycanın nəzarətində olan, qədim erməni kilsəsinin yerləşdiyi əraziyə gələrkən demişdi ki, məbədlərin üzərindəki yazılar yalandır, bu yalan aradan qaldırılmalıdır.
- Bu gün bir çox beynəlxalq təşkilatların, qurumların – BMT, YUNESKO, hətta ATƏT-in Dağlıq Qarabağa girişi qadağandır. Azərbaycan bu fürsəti əngəlləyir. Bu təcrübə o qədər də aydın deyil, çünki reallığı təhrif etmək istəyi yoxdursa, bu giriş məhdudiyyəti siyasəti çox aydın deyil.
Nikol Paşinyanın səsləndirdiyi fikirləri Azərbaycan Xarici İşlər Nazirliyin mətbuat xidməti idarəsinin rəisi Leyla Abdullayeva şərh edib. O, Nikol Paşinyanın dediklərini əsassız iddia və ittiham adlandırıb:
- Beynəlxalq ictimaiyyətin mövqeyi ilə üzləşən Ermənistan mina xəritələrini hissə-hissə Azərbaycana təqdim etdi və verilən xəritələrin dəqiqliyi isə 25% təşkil edib. Mina xəritələrinin təqdim edilməsini humanitar jest kimi qələmə vermək yanlışdır. Çünki bu, üçtərəfli bəyanatın imzalanmasından sonra Ermənistanın beynəlxalq humanitar hüquq öhdəliyi idi.
- 30 ilə yaxın Ermənistan tərəfindən darmadağın edilən əraziləri hazırda Azərbaycan yenidən qurur, bərpa edir. Bu ərazilərdəki genişmiqyaslı mina problemi köçkünlərin öz evlərinə tez qayıtmasına ciddi təhdid doğurur.
- Ermənistan baş nazirinin Azərbaycanı humanitar addımlar atmamaqda, saxlanılan erməni əsilli şəxsləri qaytarmamaqda ittiham etməsi yersiz və əsassızdır.
XİN rəsmisi onu da vurğulayıb ki, Paşinyanın Azərbaycana qarşı əsassız iddialarla çıxış etməsi onların sülh üçün hərəkətə keçmək istəklərini ciddi sual altına alır.
