Ermənistan münasibətlərin normallaşması üçün Azərbaycanın təqdim etdiyi 5 bəndlik təklifə cavab olaraq hazırladığı 6 bəndi bəyan edib. Ermənistan “İctimai Radio”sunun məlumatına görə, sənədi “İşıqlı Ermənistan” partiyasının sədri Edmon Marukyan yerli kanala müsahibəsi zamanı nümayiş etdirib. O, qeyd edib ki, rəsmi sənəd rus dilindədir və efirdə erməni dilinə tərcüməsini oxuyub.
6 bənddə qeyd edilənlər:
1. Martın 11-də biz Azərbaycandan müqavilə ilə bağlı təklif almışıq, ona cavab veririk.
2. Ermənistan Respublikasının Azərbaycana qarşı heç vaxt ərazi iddiası olmayıb və yoxdur.
3. Ermənistan üçün Dağlıq Qarabağ ermənilərinin təhlükəsizliyinin təmin edilməsi, onların hüquq və azadlıqlarına riayət olunması, eləcə də Dağlıq Qarabağın yekun statusunun müəyyən edilməsi məsələləri prinsipial əhəmiyyət kəsb edir.
4. Ermənistan ölkənin baş naziri Nikol Paşinyanın, Rusiya prezidenti Vladimir Putinin, Azərbaycan prezidenti İlham Əliyevin 2020-ci ilin 9 noyabrında, 2021-ci ilin 11 yanvar və 26 noyabr tarixli bəyanatlarında göstərilən öhdəlikləri (hərbi əsirlərin qaytarılması, yolların açılması) mühüm hesab edir.
5. Ermənistan tərəfi Azərbaycanla münasibətlərin normallaşdırılması, BMT Nizamnaməsi, Mülki və Siyasi Hüquqlar haqqında Beynəlxalq Pakt və Helsinki Yekun Aktı əsasında dövlətlərarası münasibətlərin qurulması üçün danışıqlara başlamağa hazırdır.
6. Müvafiq danışıqların təşkili üçün Ermənistan tərəfi ATƏT-in Minsk qrupunun həmsədrlərinə müraciət edib.
Normallaşma üçün hansı addımlar atılıb: Fevralın sonlarında Azərbaycan XİN-i Ermənistana sülh müqaviləsinin imzalanması üçün 5 maddədən ibarət təklif verib. Lakin Ermənistan 5 maddəlik təklifin 21 fevral tarixli olduğunu, amma onlara mart ayında təqdim olunduğunu iddia edib. Azərbaycanın xarici işlər naziri Bayramov isə bildirib ki, bunu vasitəçilərdən soruşmaq lazımdır. Bundan başqa, nazir vurğulayıb ki, cavab olaraq göndərdikləri 6 bəndlik sənədi təklif hesab etmək olmaz.
