6 il erməni girovluğunda olan Şahbaz Quliyev Kəlbəcərə getmələri ilə bağlı iddialar səsləndirib. O, bu haqda Xural TV-nin canli efirində danışıb. Quliyevin sözlərinə görə, 2014-cü ildə Kəlbəcərə həmin dövrdə baş nazirin müavini, eyni zamanda “Qaçqınkom”un sədri olan Əli Həsənov tərəfindən göndəriliblər:
Biz Kəlbəcərə Əli Həsənovun kabinetindən yola salınmışıq. Əlimizə silah, qumbara verib yola salıblar. Məni çağırdılar, “dövlətə lazımsan” deyib, göndərdilər. Məni tək göndərmək istəyirdilər. Dedim, oraları Dilqəm yaxşı tanıyır. Həmin vaxt Dilqəm Şəmkirdə polisə düşmüşdü, həbsdəydi. Onu çıxartdırıb bələdçi kimi bizim yanımıza gətirdilər.
deyə qeyd edib
Şahbaz Quliyev bildirib ki, Əli Həsənova verdiyi kaseti əsir düşən günü Xankəndidə ermənilər gətirib onlara göstəriblər.
Barəsində səsləndirilən ittihamlara cavab verən Əli Həsənov Şahbaz Quliyevi tanımadığını deyib:
Mən Müdafiə Nazirliyiyəm, yoxsa xüsusi xidmət orqanıyam? Dilqəm Əsgərova yığın, deyəcək onun danışdıqları nədir və nə üçün danışır. Mənim onunla heç bir əlaqəm olmayıb, elə adam da tanımıram.
bildirib
2014-cü ildə nə baş verib: 2014-cü il iyulun 11-də Dilqəm Əsgərov, Şahbaz Quliyev və Həsən Həsənov həmin illərdə işğal altında olan Kəlbəcər rayonuna yaxınlarının məzarlarını ziyarət etmək üçün getdiklərini deyiblər. Ermənistan Silahlı Qüvvələri əməliyyat keçirərək Dilqəm Əsgərov və Şahbaz Quliyevi girov götürüb, Həsən Həsənov isə güllələnərək öldürülüb. Daha sonra hər ikisi qondarma Dağlıq Qarabağ Məhkəməsinə çıxarılıb, Dilqəm Əsgərova ömürlük, Şahbaz Quliyevə isə 22 il həbs verilib.
Azərbaycana nə vaxt qaytarılıblar: 2020-ci ildə 10 noyabr tarixli üçtərəfli bəyanatın imzalanmasından sonra erməni tərəfi ilə əsir və girovların “hamının hamıya” prinsipi əsasında dəyişdirilməsi barədə razılıq əldə olunub. 6 illik girovluqdan sonra Şahbaq Quliyev və Dilqəm Əsgərov 2020-ci il dekabrın 14-də Azərbayacan gətirilib.
