“Bolt” taksi xidmətinin sürücüləri etiraz aksiyası keçirmək qərarına gəliblər. Bu haqda məlumatı sosial şəbəkədə şirkətin işçilərindən olan Nicat Məmmədov yayıb. Onun sözlərinə görə, aksiyanı mayın 27-nə planlaşdırıblar:
5-ci gün (27 may) axşam saat 5-7 arası bütün “Bolt” sürücüləri hamı birdən proqramı bağlayıb, “Bolt”u boykot edəcəyik. Bu 2 saat ərzində kim ki, gündəlik kirayə verir, başqa şirkətin proqramı ilə işləyə bilər. Təki Bolt bağlı olsun.
Nicat Məmmədov
Aksiyanın təşkilatçısı olan Məmmədov “Bolt” şirkətinə qarşı irəli sürdükləri tələbləri qeyd edib.
Sürücülərin tələbləri aşağıdakılardır:
- Komissiya 20%-dən 10%-ə endirilsin;
- Minimal qiymət 2.40 AZN-dən başlasın;
- Gedilən ünvan, qiymət, ödəniş üsulu sürücüyə göstərilsin;
- Kartla olan sifarişləri nağdlaşdırmaqda sürücülərə çətinlik yaradılmasın. 1-2 gün ərzində avtomatik sürücünün hesabına köçsün və ya gündəlik benzin talonu verilsin;
- Gözləmə vaxtına görə hər dəqiqə ən azı 10 qəpik hesablansın (hazırda 2 qəpikdir);
- Müştəri sifariş verdiyi ünvandan əlavə yerə sürdürsə, onun ödənişi programda avtomatik hesablansın;
- Sürücülər səbəbsiz yerə bloklanmasın. Problem varsa, ədalətli şəkildə araşdırılsın;
- Məsafəyə görə məbləğlər düzgün hesablansın. Bəzən yol olmayan yerlərdən məsafə hesablanır. Bu, əsasən mərkəzdən kənar yerlərdə olur.
- Sürücülərin pulunu verməyib qaçan müştərilərin ödənişi “Bolt” tərəfindən tam olaraq kompensasiya olunsun.
- Ləğv edilən sifarişlərə görə sürücülərə kompensasiya ödənilsin.
Vurğulanıb ki, bu, boykotun 1-ci mərhələsidir və “Bolt” sürücülərin tələblərini yerinə yetirənə qədər etirazın müddəti 2 saatdan daha artıq olacaq.
