Mayın 22-də Brüsseldə prezidenti İlham Əliyev, Avropa İttifaqı Şurasının prezidenti Şarl Mişel və Ermənistanın baş naziri Nikol Paşinyan arasında 3-cü dəfə üçtərəfli görüş baş tutub. Bu toplantıdan əvvəl isə Şarl Mişel prezident İlham Əliyev və Ermənistan baş naziri Nikol Paşinyanla təkbətək görüşüb. Hər iki liderlə görüş 2 saata yaxın davam edib.
İlham Əliyev görüşdə nələrdən danışıb:
- Sülh müqaviləsinin imzalanması üçün Azərbaycan tərəfinin təqdim etdiyi 5 prinsip əsas rol oynayır.
- I Qarabağ müharibəsində itkin düşmüş 4 minə yaxın şəxsin taleyinə aydınlıq gətirilməsi vacibdir.
- İşğaldan azad edilmiş ərazilərimizdə mina problemi həllini tapmalıdır.
- Ermənistan 10 noyabr Bəyanatının bütün müddəalarını icra etməlidir.
Təkbətək görüşdən sonra isə üçtərəfli toplantı baş tutub. Aprel ayında olduğu kimi bu görüş də 4 saata yaxın davam edib.
Görüşdə əsas müzakirə mövzuları:
- sərhəd məsələləri;
- kommunikasiyaların açılması;
- sülh müqaviləsi.
Sərhəd məsələləri
- Yaxın günlərdə dövlətlərarası sərhəddə Sərhəd Komissiyalarının ilk birgə iclası keçiriləcək. Bu görüşdə delimitasiyası və sabit vəziyyətin ən yaxşı şəkildə necə təmin edilməsi ilə bağlı bütün suallara cavab tapılacaq.
Kommunikasiyaların açılması
- Azərbaycanın qərb hissəsi ilə Naxçıvan və Ermənistanın müxtəlif bölgələri arasında Azərbaycandan keçməklə tranzit, eləcə də hər 2 ölkənin kommunikasiya infrastrukturu vasitəsilə beynəlxalq daşımaları tənzimləyən prinsiplər barədə razılığa gəlinib.
- Sərhəd idarəçiliyi, təhlükəsizlik, torpaq haqları, həmçinin beynəlxalq daşımalar kontekstində gömrük prinsipləri barədə razılığa gəlinib. Baş nazirlərin müavinləri yaxın günlərdə bu işi davam etdirəcəklər.
Sülh müqaviləsi
- Ermənistan və Azərbaycan arasında dövlətlərarası münasibətləri tənzimləyən sülh müqaviləsi ilə bağlı müzakirələri davam etdirmək barədə razılığa gəlinib. Xarici işlər nazirlərinin başçılıq etdiyi qruplar bu prosesi yaxın həftələrdə davam etdirəcəklər.
Bu görüşdə ilk dəfə Qarabağdakı etnik ermənilərlə bağlı mövzuya toxunan Mişel bildirib ki, hər iki tərəf qeyd edilən erməni əhalisinin hüquqları və təhlükəsizliyi təmin etməlidir.
