Avropa İnsan Haqları Məhkəməsi Azərbaycandan göndərilən 7 şikayət ərizəsinə baxaraq 3-ü barədə qərarını elan edib. Məlumata görə, məhkəmə qərarları hökumətin təqdim etdiyi təktərəfli bəyannamə və dostca anlaşmaları əsasında çıxarıb.
Şikayətlər hansı motivdə olub?
- Hümeyir Əhmədovun ölkədən çıxışına qadağa qoyululub. O, hərəkət azadlığı hüququnun pozulduğunu, eyni zamanda bu məsələ ilə bağlı ölkə daxilində effektiv müdafiə vasitələrinin mövcud olmadığını iddia edib.
- “Yehova Şahidləri” dini icmasının üzvləri Rəşad Niftəliyev və digər 4 nəfər 2011-ci ildə Gəncədə keçirilən dini ayin zamanı saxlanılaraq məhkəməyə çıxarılıblar. Onlar dini məclislərin təşkili və keçirilməsi qaydalarının pozulmasında günahkar bilinib və 500-1500 AZN cərimə olunublar. Bu hadisədən sonra şikayətçilər Avropa Məhkəməsində şəxsi həyata hörmət, dini etiqad azadlığı, toplaşmaq azadlığı və ayrıseçkiliyin qadağan olunması hüquqlarına müdaxilə edildiyini bildiriblər.
- Hüseynov və Mirqasımov yerli məhkəmələrin qərarlarının icra etmədiyini, mülkiyyət və ədalətli məhkəmə araşdırması hüquqlarının pozulduğunu iddia ediblər.
Məhkəmə qərarı, cərimələr
- Hümeyir Əhmədovun şikayəti dostca anlaşma ilə yekunlaşıb. Anlaşmaya əsasən, hökumət ərizəçiyə mənəvi zərər əvəzi 5000, xərc və məsrəflərə görə isə 1000 avro ödəməlidir.
- İkinci şikayətdə isə 5 ərizəçinin hər birinə mənəvi zərərə və xərclərə görə 3000 avro cərimə ödənilməsi barədə qərar çıxarılıb.
- Sonuncu müraciətdə hökumət və şikayətçilər dostca anlaşıblar. Avropa Məhkəməsinin qərarına əsasən, hökumət Hüseynova 2350, Mirqasımova 3850 avro mənəvi zərər və xərclərin əvəzini ödəməlidir.
Ümumilikdə Azərbaycan hökumətinin ödəməli olduğu cərimə 27200 avro təşkil edir.
