Dağıstanın İzberbaş qəsəbəsində orta məktəb şagirdi Ukraynanı dəstəkləyən şüarlar səsləndirərkən çəkilmiş videosu qalmaqala səbəb olub. OC Media yazır ki, videodan sonra “Dagestanskiye İzvestiya” yeniyetmənin ictimaiyyətdən üzr istəmə videosunu yayımlayıb.
Məktəbdə nə baş verib: 11 saylı tam orta məktəbin şagirdi təhsil müəssisəsində keçirilən tədbir zamanı mikrofona yaxınlaşaraq “Müharibəyə yox! Ukraynaya azadlıq! Putin şeytandır!” şüarları səsləndirib.
Daha sonra isə Zuxra Albekova etdiyi hərəkətə görə peşman olduğunu, sadəcə diqqəti özünə çəkmək istədiyini söyləyib:
Son vaxtlar imtahanlar məni narahat edir və bütün bunların fonunda anamla dava edirdim. Səhvimi etiraf edirəm və hamının bayramını pozduğum üçün üzr istəyirəm.
deyib
Yeniyetmənin anası Zuxranın imtahanlara görə stres keçirdiyini, evdə yaşanan problemlərə görə belə davrandığını deyib. O, qızının “emosional və düşüncəsiz davranışına” görə üzr istəyib:
Mən ölkə prezidenti Vladimir Vladimiroviç Putinin siyasətini tam dəstəkləyirəm. Mən ölkəmin vətənpərvər vətəndaşıyam, ona görə də Ukrayna ərazisində davam edən xüsusi əməliyyatları dəstəkləyirəm. Qızımı yetişdirərkən bəzi şeyləri görmədiyim və vacib nələrsə nəzərimdən qaçırdığım üçün çox təəssüflənirəm. Söz verirəm ki, bir daha belə şey yaşanmayacaq.
söyləyib videoda
Ailə necə cəzalandırılıb: Yeniyetmə “Rusiya Federasiyası Silahlı Qüvvələrinin reputasiyasını təhqir etmək”də ittiham olunaraq 100.000 rubla qədər (1.700 ABŞ dolları) cərimə olunub. Anaya isə qızına “dəstək və təhsil verməklə bağlı öhdəliklərini yerinə yetirmədiyinə” görə inzibati protokol tərtib edilib və onu 5 000 rubla qədər (86 dollar) cərimə gözləyir.
Hadisədən sonra hansı iddialar yayılıb: “Kavkaz.Realii” regional hökumətdən əldə etdiyi məlumata əsasən, Dağıstanın lideri Sergey Melikov İzberbaş merinə zəng edərək hadisəni şəxsən araşdırılmasını istəyib. Daha sonra yerli hakimiyyət ana və qızını üzr istəməyə məcbur edib. Dağıstan və Şimali Qafqazdan xəbərləri yayımlayan “Ask Rasul” teleqram kanalı isə məlumat yayıb ki, Dağıstanın hakimiyyəti İzberbaş şəhərinin təhsil şöbəsinin müdiri və 11 saylı orta məktəbin direktorundan istefa məktubu yazmalarını istəyib.
