Çeçenistanın təhlükəsizlik qüvvələri tənqidçi, siyasi fəal Müslüm Bisultanovu həyat yoldaşının gözü önündə güllələyib, qadını isə qaçırıb. Bu barədə Çeçenistanın “1ADAT”adlı ictimai hərəkatı məlumat yayıb.
Hadisə barədə nə deyilir: “1ADAT”ın telegram kanalında yayılan məlumata əsasən, mayın 24-də üç çeçen polis Bisultanovu Znamenskoye kəndindəki evindən qaçırmağa çalışıb. Bilsultanov həyat yoldaşını polislərdən qorumaq istəyərkən güllələnib. Qadın isə oğurlanaraq Nadtereçnı rayon polis bölməsinə aparılıb. Hazırda onun vəziyyəti barədə heç bir məlumat yoxdur.
“1ADAT” hərəkatından OC Mediaya bildirilib ki, Bisulatov hakimiyyətə qarşı fikirlərini gizlətməyib:
O, daha əvvəl bir neçə dəfə qaçırılıb. Bu dəfə də onu yenidən qaçırmaq istəyiblər.
deyə vurğulanıb
Çeçenistanda baş verənlər haqda məlumatlar paylaşan digər teleqram kanalı “ASTRA” isə məlumat yayıb ki, Bisultanovun oğurlanması ilə bağlı xüsusi tapşırıq verilib. Bu hadisəyə qarışanlar arasında baş leytenant Rəsul Kusiev, leytenant Adəm Mudayev və mayor Həsən Musayev var. İctimai fəalı öldürən isə mayor Musayev olub.
Bisultanovdan sonra kimlər həbs edilib: Müslüm Bisultanovun qohumu Məhəmməd İslamov federal axtarışa verilib. Rəsmi məlumatlara görə, o, sərhədi keçməyə çalışarkən tapılıb. Atəşə tutulan Məhəmməd hazırda xəstəxana müalicə olunur.
Bisultanovun yaxın dostu İlyas Elmaurzayev atəş səsini eşidəndə dostuna zəng edib. Daha sonra İlyas və əmisi oğlu İslam fedaral axtarışa verilib. İlyas Çeçenistanı tərk edə bilib, İslam isə könüllü olaraq polisə təslim olub. Onun Nadtereçnı rayonunun polis bölməsində saxlanılaraq işgəncələrə məruz qaldığı iddia edilir.
