Müsəlman Birliyi Hərəkatının sədri, Qobustanda həbsxanada olan Taleh Bağırzadə 3 iyundan aclıq aksiyasına başlayıb. Bu barədə hərəkatın feysbuk səhifəsində məlumat yayılıb. Qeyd edilib ki, T. Bağırzadə aksiya ilə bağlı həbsxanasının rəhbərliyinə yazılı bildiriş ünvanlayıb.
Aksiyaya hansı səbəb göstərib: Hərəkat rəhbəri bildirib ki, son dövrlər polis idarələrində vətəndaşlara verilən işgəncələr zamanı Allah söyülür, təhqir edilir. Bu səbəbdən də aclıq aksiyasına başlayıb. T.Bağırzadə bəyan edib ki, bu cür insidentlər zamanı Dövlət Təhlükəsizlik Xidmətinin adı hallanır və əməlin iştirakçıları cəzalanana qədər aksiyanı davam etdirəcək.
Rəsmi münasibət necədir: Penitensiar Xidmət Taleh Bağırzadənin aclıq etməsi ilə bağlı məlumatlara hələ reaksiya verməyib.
Taleh Bağırzadə niyə həbsdədir: O, 2015-ci il noyabrın 26-da Nardaranda 6 nəfərin ölümü ilə nəticələnmiş polis əməliyyatı nəticəsində həbs olunub. Ona qarşı qəsdən adam öldürmə, terrora çağırış, dövlət çevrilişinə cəhd də daxil olmaqla, 20-dən çox ağır maddə ilə ittiham irəli sürülüb. İlahiyyatçı 2017-ci ilin yanvarında Bakı Ağır Cinayətlər Məhkəməsinin hökmü ilə 19 il müddətinə azadlıqdan məhrum edilib. Məhkəmə hökmünə görə, həbsinin ilk 7 ilini Qobustan Qapalı Həbsxanasında çəkməlidir.
