Bir qrup alimə qarşı Şuşaya konfransa aparılmaq adı ilə dələduzluq edildiyi iddia olunur. Bu haqda həmin şəxslərdən biri olan tarixçi alim Arif Gürşadoğlu öz feysbuk hesabında yazıb. Onun sözlərinə görə, səfər üçün hər adamdan 70 AZN pul toplanıb:
Demək, Əlvan Cəfərov adlı bir nəfər – “İKSAD Azərbaycan”ın baş koordinatoru Şuşada konfrans keçiriləcəyi vədi ilə qeydiyyatdan keçmiş 470 nəfər alimi Şuşa adıyla aldadıb. Konfransa qatılanların az olduğunu bilərək belə bir çirkin oyun qurulub. Bəlkə də Əlvan Cəfərovluq deyil, ancaq istənilən halda bir çirkin oyun qurulub.
deyə bildirib
A.Gürşadoğlu qeyd edib ki, yola çıxacaqları ərəfədə Şuşaya cəmi 100 nəfər seçilmiş alimin getdiyi məlum olub:
Gedənlərin içində bir ailədən 4 nəfər və alim olmayanlar da var. İndi də yazıb ki, heç kim ödənişini geri istəməsin! Xeyirdi? Hər adamdan 70 manat almaq və onu qaytarmamaq bu qədər asandır? 370 nəfərdən 70 manat alanda 25 min 900 manat edir.
söyləyib
Adı hallanan Əlvan Cəfərovun məsələ ilə bağlı heç bir açıqlaması yoxdur. Lakin Daxili İşlər Nazirliyinin mətbuat xidməti APA-ya bildirib ki, faktla bağlı hazırda Yasamal rayon Polis İdarəsində araşdırma aparılır və zərərçəkənlərin idarəyə müraciət etməsi xahiş edilir.
Əlvan Cəfərov kimdir: O, Türkiyənin Mədəniyyət və Turizm Nazirliyinin tərkibində olan İqtisadi İnkişaf və Sosial Araşdırmalar İnstitutunun (İKSAD) Azərbaycan üzrə baş təmsilçisidir. Ə. Cəfərov həm də Azərbaycan Dövlət Pedaqoji Universitetinin əməkdaşıdır.
