Artıq 11 gündür aclıq aksiyası edən Müsəlman Birliyi Hərəkatının sədri Taleh Bağırzadəyə dəstək məqsədilə aksiyaya hərəkatın üzvü olan digər siyasi məhbuslar da qoşulublar. İyunun 6-sından başlayaraq aclığa qoşulanlar Seyfəddin Şirvanov, hərəkatın digər üzvləri Cabbar Cabbarov, Abbas Hüseyn, Razi Hümbətov, Cahad Babakişizadə, Vəli Allahverdiyev, “Gəncə məhbusu” Firudin Zeynalov, Fariz Məmmədov, Elşad İbrahimov və jurnalist Polad Aslanovdur.
İyunun 13-də Müsəlman Birliyi Hərəkatının bir qrup üzvü aclığa başlayan məhbuslarla bağlı mətbuat konfransı keçirib. Hərəkatın sədr müavini Elçin Qasımov aclıq aksiyası edənlər haqda heç bir rəsmi məlumat verilmədiyini vurğulayıb:
Daxili İşlər Nazirliyinin mətbuat xidməti bəyanat yayaraq məsələni təkzib edib. Niyə, ictimaiyyətə aksiyanın səbəbi, etiraz edən məhbusların tələbi haqda məlumat verilmir, münasibət bildirilmir?
deyə bildirib
E.Qasımov vurğulayıb ki, işgəncə verilməsi məsələsini sivil yolla, hüquqi şəkildə həll etməyə çalışsalar da, hakimiyyət bunu istəmir:
Hakimiyyət xalqı, aclıq edən məhbusları, onların ailələrini, xaricdən olan təhdidləri nəzərə almasın. Yalnız Allahı nəzərə alsınlar. Biz 10 gündür səbir edirik, bilmirik səsimizi hansı formada çatdıraq. Niyə, bizim vətəndaşımız dövlət orqanında söyülür, döyülür, dini inancı təhqir olunur? Sualımıza cavab versinlər, təkzib etməsinlər.
deyib konfransda
Hərəkatın sədr müavini bildirib ki, araşdırma aparılmağını və günahkarların cəzalandırılmasını istəyirlər.
Taleh Bağırzadənin həyat yoldaşı Leyla İsmayılzadə aclıq edən digər məhbusların ailə üzvləri ilə birgə 10 iyunda Beynəlxalq Qırmızı Xaç Cəmiyyətinə müraciət etdiklərini bildirib:
Hər birimiz öz məhbusumuz barədə məlumat verdik. İlk öncə Ağali Yəhyayevə baş çəkmələrini, səhhəti ilə maraqlanmalarını xahiş etdik. Çünki onun üzərində işgəncə izləri var. Bizə bildirdilər ki, A.Yəhyayevə tez bir zamanda baş çəkə bilməyəcəklər. Digər məhbuslarla isə 1-2 ay ərzində görüşə bilərlər.
söyləyib
Leyla İsmayılzadə Taleh Bağırzadənin səhhətinə də diqqət çəkib. Onun sözlərinə görə, T.Bağırzadənin 2 gündür qızdırması var, gözü qaralır, səsi zəif gəlir.
Aclıq aksiya niyə başlayıb: Taleh Bağırzadə son dövrlər polis idarələrində vətəndaşlara işgəncələr verilərkən Allahın söyüldüyünü, təhqir edildiyini deyib. O,buna etiraz olaraq aclıq aksiyasına başladığını bəyan edib. T. Bağırzadənin və ona qoşulan digər məhbusların tələbi dini inancın təhqirinə yol verən polis işçilərinin cəzalanmasıdır.
Nə baş verib: Mayın 20-də Bakı Ağır Cinayətlər Məhkəməsinin qərarı ilə Müsəlman Birliyi Hərəkatının üzvü Razi Hümbətov 6 il azadlıqdan məhrum edilib. Məhkəməni izləməyə gələn hərəkat üzvlərindən 5-i İmran Məmmədli, Elgiz Məmmədov və Ağəli Yəhyayev polisə müqavimət ittihamı ilə təqsirləndirilərək bir aylıq inzibati həbsə məhkum edilib. Hərəkatın sərbəst buraxılan üzvləri Mail Kərimov və Süleyman Ələkbərov isə Nəsimi RPİ-nin 22-ci polis bölməsində işgəncəyə məruz qaldıqlarını bildiriblər.
İşgəncələrlə bağlı rəsmi açıqlama nə olub: Daxili İşlər Nazirliyi mətbuat xidmətinin rəisi, polis polkovniki Ehsan Zahidov iddiaların polisi vəzifəsindən çəkindirmək üçün atılan uğursuz cəhd adlandırıb. O, Polisin dini təhqir etməsi barədə yayılan məlumatlarım böhtan xarakterli şayiələr olduğunu, Azərbaycan polisinin bütün dinlərə, o cümlədən mənsub olduqları müqəddəs İslam dininə, milli dəyərlərinə böyük hörmət və ehtiramla yanaşdıqlarını deyib.
