Bakıda 18 iyunadək davam edəcək “Qlobal dünya nizamına təhdidlər” mövzusunda IX Qlobal Bakı Forumu başlayıb. Bu gün start götürən təbdirin açılış mərasimində prezident İlham Əliyev iştirak edib. O, çıxışı zamanı 10 noyabrda bağlanan bəyanatdan sonra Ermənistanla olan münasibət, Minsk qrupu və Dağlıq Qarabağı əhatə edən digər mövzulara toxunub.
Prezident nələri deyib:
- Ermənistan hökuməti II Qarabağ müharibəsindən dərs çıxarmalı və Azərbaycana qarşı ərazi iddialarına son qoymalıdır. Ermənistan Azərbaycanın ərazi bütövlüyünü şübhə altına alır, Azərbaycanı da onun ərazi bütövlüyünə qarşı analoji addımlar atmağa vadar edir.
- Əgər Ermənistan Qarabağ erməniləri üçün status tələb etməkdə davam edərsə, niyə, azərbaycanlılar Qərbi Zəngəzur üçün status tələb etməsinlər? Çünki bu ərazinin əhalisi tamamilə azərbaycanlılardan ibarət olub.
- Ermənistan hökumətindən qondarma Dağlıq Qarabağın statusu barədə bəyanatlar eşidirik. Bu isə həm səmərəli deyil, həm də Ermənistanın özü üçün təhlükəlidir. Ermənistan hökuməti tarixi yenidən yazmaq cəhdlərindən əl çəkməlidir. Tarix artıq yazılıb.
- Bizim üçün Zəngəzur dəhlizi açılmasa sülh haqqında danışmaq çətin olacaq və Azərbaycanın Ermənistanla normal birgə yaşayış, qonşuluq münasibətlərinə yönəlmiş səyləri uğursuzluğa düçar olacaq.
- Minsk qrupu 28 il ərzində heç bir nəticə əldə etməyib. Azərbaycan Qarabağ münaqişəsini həll edəndən sonra Minsk qrupuna ehtiyac qalmayıb. Onlar tərəfindən hazırlanan Madrid prinsipləri yerinə yetirilib.
- Ermənistanla münasibətlərin normallaşması ilə bağlı tərəfimizdən irəli sürülən təkliflərə 2 ölkənin bir-birinin sərhədlərinə qarşılıqlı hörməti də daxildir. Şadıq ki, Ermənistan hökuməti bu 5 prinsipi qəbul etdi.
İlham Əliyev onu da vurğulayıb ki, Ermənistan Azərbaycanın təklif etdiyi 5 prinsipi qəbul etdiyinə görə sadəcə praktiki iş görmək qalıb.