Avropa Komissiyası Gürcüstanın Avropa İttifaqına namizədlik statusunun bu ayın sonunda ləğv edilməsini tövsiyə edib. OC Media yazır ki, komissiyanın sədri Ursula fon der Leyen qərarın bir sıra siyasi və iqtisadi səbəblərə əsaslandığını qeyd edib. Leyen Gürcüstan ilə bağlı təklifin “əsaslı” olduğunu vurğulayaraq ölkənin bir sıra meyarlara cavab verəcəyi halda təkliflərə gələcəkdə yenidən baxılacağını bildirilib:
Nə qədər tez nəticələr əldə etsəniz, bir o qədər sürətli irəliləyiş olar.
deyib
Aİ-nin Qonşuluq Siyasəti və Genişlənmə Danışıqları üzrə Komissarı Oliver Varhelyi bildirib ki, Gürcüstanın ərizəsinə yenidən baxılması üçün bir sıra fundamental meyarlar yerinə yetirilməlidir.
Hansı meyarlar qeyd edilib:
• demokratiyanın yaxşılaşması,;
• siyasi qütbləşmənin dayandırılması;
• məhkəmə islahatları;
• antikorrupsiya institutlarının müstəqilliyi;
• mətbuat azadlığı.
Aİ-nin cavabına reaksiya necədir: İqtidarda olan “Gürcü Arzusu” partiyası rədd cavabını qətiyyətlə pisləyib. Partiya sədri İrakli Kobaxidze komissiyanın tövsiyəsini “məyusedici” olaraq dəyərləndirib, bunun obyektiv qərardan çox siyasi məqsədli olduğunu qeyd edib. Kobaxidzenin sözlərinə görə Ukrayna və Moldovaya namizəd statusu verilməsi Rusiyanın Ukraynaya hücumundan, onun iqtisadi və humanitar nəticələrindən qaynaqlanır və bu ölkələri “cəsarətləndirmək” addımı hesab etmək olar.
Partiya sədri qeyd edib ki, Gürcüstanın bu statusu almaq üçün Ukrayna və Moldovadan fərqli olaraq kifayət qədər fədakarlıq etmədiyini başa düşürlər:
Biz başa düşürük ki, indiyə qədər 14, xüsusən də 30 il əvvəl tökülən qurbanlar və qanlar, 300 min məcburi köçkün artıq avropalı tərəfdaşlarımız üçün aktual deyil.
bildirib
Gürcüstandakı müxalifətçilər hökuməti yeni islahatlar həyata keçirməməkdə ittiham edib.
Nə baş verib: Rusiyanın Ukraynaya hərbi müdaxiləsindən sonra Gürcüstan, Moldova və Ukrayna Avropa İttifaqına üzv olmaq üçün müraciət ediblər. Lakin, Gürcüstanda demokratiya, qanunun aliliyi ilə bağlı narahatlıqlar Brüsseldə və digər Avropa ölkələrinin paytaxtlarında geniş tənqidlərə səbəb olub. Ukrayna və Moldovaya isə ittifaqa üzv olmaq üçün dərhal namizədliyin təklif edilməli olduğunu bildirilib.
Yekun qərar nə vaxt olacaq: Hər üç ölkənin müraciəti ilə bağlı yekun qərarın iyunun 23-24-də Brüsseldə baş tutacaq görüşdə veriləcəyi gözlənilir. Həmin görüşdə Avropa Şurasına üzv dövlətlərin başçıları bir araya gələcək.
