Bazar ertəsi Tbilisinin mərkəzində on minlərlə insan ölkənin Avropa İttifaqına üzv olmasına dəstək olmaq üçün aksiya keçirib. OC Media-nın məlumatına görə, bu nümayiş ölkə tarixindəki ən böyük aksiyalardan biri hesab olunur. Aksiyanı Gürcüstanın “Utanc” liberal qrupu təşkil edib.
Aksiya hansı şəhərlərdə baş tutub: Batumi, Kutaisi və Zuqdidi şəhərləri ilə yanaşı, Avropanın 8 şəhərində də aksiyalar keçirilib. Bu sırada London, Praqa, Hannover, Paris, Budapeşt, Berlin, Hamburq və Reykyavik var.
Təşkilatın bəyanı nə olub: Onlar nümayiş zamanı ölkənin Aİ-yə üzvlüyünə əsas maneənin hakim “Gürcü Arzusu” partiyasının yaradıcısı Bidzina İvanişvili olduğunu bildiriblər. Təşkilat üzvləri hökumət qarşısında tələblər siyahısı irəli sürəcək vətəndaş cəmiyyəti qrupları, media qurumları, müxalifət partiyaları, tələbə qrupları və həmkarlar ittifaqlarından ibarət hərəkat yaratdıqlarını açıqlayıblar. Bəyan ediblər ki, tələblər yerinə yetirilməsə, ölkədə kütləvi vətəndaş itaətsizliyi kampaniyasında iştirak edəcəklər. Bundan başqa, təşkilatçılar cümə günü daha bir aksiyanın keçiriləcəyini bildiriblər.
AP deputatlarından aksiyaya dəstək: Avropa Parlamentinin bir neçə üzvü əvvəlcədən lentə alınmış dəstək mesajları ilə kütləyə müraciət edib, bəziləri isə Gürcüstan hökumətini hədəfə alıblar. Avropa Parlamentinin litvalı deputatı Rasa Yuknyaviçene Gürcüstan hökumətini “Aİ Komissiyasının tövsiyəsini rədd etmək üçün əlindən gələni etməkdə” günahlandırıb. O, seçki qutusunun başında dayanıb insanları “Sakartvelonu (Gürcüstanı) Rusiyaya doğru itələyənləri xatırlamağa” çağırıb.
Aksiyaya siyasi reaksiya necə olub: Nümayiş hakim “Gürcü arzusu” partiyasının tənqidi ilə qarşılanıb. Bu elan edildikdən sonra bir neçə partiya lideri mitinqin müxalif Vahid Milli Hərəkat Partiyası tərəfindən təşkil edildiyini dəfələrlə bəyan ediblər.Tbilisi meri Kaxa Kaladze də bənzər iddianı səsləndirib:
Bu, Milli Hərəkatın mitinqidir. Biz hər şeyi öz adı ilə çağırmalıyıq. İnsanlar hər şeyi görür və başa düşürlər. Əgər kimsə hər hansı təbliğatla ictimaiyyəti çaşdırdığını düşünürsə, çox yanılır.
Gürcüstan – Aİ son vəziyyət: Avropa Komissiyası Moldova və Ukraynanın Avropa İttifaqına üzvlüklə bağlı müraciətlərini dəstəkləyib, Gürcüstana isə namizədlik statusundan imtina etməyi tövsiyə edib. Komissiya Gürcüstanın yenidən namizəd olması üçün müəyyən şərtləri yerinə yetirməsini tövsiyə edib və ölkədəki hökümətin demokratik yolla idarə olunmaması haqqında Qərb ölkələrinin tənqidlərini xatırladıb.
