İyunun 16-sında prezident İlham Əliyevin Türkiyənin keçmiş baş naziri Binəli Yıldırımla görüşündə verilən hədiyyə günün müzakirə mövzusuna çevrildi. Belə ki, Binəli Yıldırım prezidentə qılınc bağışlayıb və hədiyyəsini təqdim edərək bildirib ki, bu, İstanbulu fəth edən Fateh Sultan Mehmedin qılıncının eynisidir, Qarabağın fatehi İlham Əliyevə hədiyyə olunur. Ümumiyyətlə, bu, prezidentə hədiyyə edilən ilk silah deyil. Ona müharibə bitəndən bəri fərqli vaxtlarda silah bağışlanıb.
Hansı silahlar hədiyyə edilib?
2021-ci il yanvar, İCESCO-nun Baş direktoru Salim bin Məhəmməd əl-Malik yaşı 100-dən çox olan qılınc bağışlayıb. O, hədiyyənin 44 günlük müharibədə qələbə münasibətilə olduğunu deyib.
2021-ci il may, Türkiyənin nəqliyyat və infrastruktur naziri Adil Karaismailoğlu qılınc hədiyyə edib. İham Əliyev bunun barış xəncəri olduğunu deyib.
2022-ci il may, Rize-Artvin Hava Limanının açılışında Türkiyənin Milliyyətçi Hərəkat Partiyasının (MHP) sədri Dövlət Bağçalı qızıl tutacaqlı, üzərində “Qarabağ Fatehi” yazılmış yerli istehal SAR9 model tapança verib.
Bundan başqa, müxtəlif vaxtlarda İlham Əliyevə maraqlı hədiyyələr bağışlanıb. Buraya papaq, təsbeh və s. daxildir.
Nələr bağışlanıb?
2021-ci il noyabr, Binəli Yıldırım təsbeh hədiyyə edib.
2021-ci il dekabr, Türkiyə Yüksek Öğretim Kurulu başqanı Erol Özvar Quran ayəsi yazılan çərçivə təqdim edib. Orada “əl-Fəth” surəsinin 1-ci ayəsindən seçilən “Həqiqətən biz sənə açıq-aşkar bir zəfər bəxş etdik”- cümləsi yazılıb.
2021-ci il iyul, Oklahoma ştatının qubernatoru Con Kevin Stitt “kovboy” papağı hədiyyə edib.
