Müsəlman Birliyi Hərəkatının rəhbəri, 20 gündür ki, həbsxanada aclıq aksiyası keçirən Taleh Bağırzadə aksiyanı dayandırıb. Bu barədə MBH-nın sədr müavini Elçin Qasımov məlumat yayıb. O, T.Bağırzadənin həbsxanadan yolladığı mesajı paylaşıb:
Aclıq aksiyasının dayandırılmasıyla əlaqəli çoxsaylı çağırışlar, önəmli şəxsiyyətlərin müraciəti, həbsxanalarda bizimlə birgə aclıq aksiyasına qoşulan dəyərli və cəsarətli qardaşlarımızın səhhətlərində yaranan problemləri, onların əziz ailələrinin narahatçılığını nəzərə alaraq bu gündən etibarən aclıq aksiyasını dayandırıram. Ancaq mübarizəni əsla dayandırmırıq. Allahı söyərək təhqir edən, dövlət orqanlarında vətəndaşlara qarşı işgəncə, zorakılıq, şəxsiyyəti alçaldan halların qarşısı alınmayana, həmin cinayətkarlar cəzalanmayana kimi hər cümə günü sivil etiraz aksiyaları davam edəcək.
deyib
Taleh Bağırzadə mesajında vurğulayıb ki, qeyd etdiyi halların rejim tərəfindən ört-basdır edilərək unutdurulmasına əsla imkan verməyəcəklər.
Nə baş verib: Hərəkat sədri son dövrlər polis idarələrində vətəndaşlara verilən işgəncələr zamanı Allahın söyüldüyünü, təhqir edildiyini əsas göstərərək iyunun 3-də Qobustan həbsxanasında aclıq aksiyasına başlamışdı. İyunun 6-dan başlayaraq isə T. Bağırzadəyə MBH-nın 10-a yaxın digər üzvləri də qoşulmuşdu.
