Ermənistanın baş naziri Nikol Paşinyan iyunun 27-də onlayn mətbuat konfransı keçirib. O, jurnalistlərə Laçın şəhərinin Azərbaycana verilməsindən danışıb və digər məsələlərlə bağlı iddialarını səsləndirib.
Paşinyan nələr deyib:
- Bakı Ermənistanın üçtərəfli bəyanatla bağlı öhdəlikləri yerinə yetirmək istəmədiyi görüntüsü yaratmaq istəyir və bununla Ermənistana qarşı yeni müharibəni legitimləşdirməyə çalışır.
- Laçın dəhlizinə alternativ yolun tikintisi başa çatdıqdan sonra keçmiş Dağlıq Qarabağ Muxtar Vilayətindən kənarda yerləşən ərazilər Azərbaycana veriləcək. Azərbaycanın nəzarətinə keçəcək Laçın (Berdzor) şəhəri və Zabux (Ahavno) kəndinin əhalisi mənzillə təmin olunacaq.
- Dəmir yolunun tikintisinə başlamağa hazır olduğumuzu bəyan etdim. Bakı bu təklifdən imtina etdi. Sənəd layihəsini komissiyanın rusiyalı həmsədri təqdim edəndə Ermənistan imzalamağa hazır olduğunu bildirib, Azərbaycan tərəfi imtina edib.
- Əsirlərin 90%-i Rusiya sülhməramlılarının yerləşdirilməsindən sonra götürülüb. Azərbaycan Qarabağdakı sülhməramlıları gözdən salmağa çalışır, bilərəkdən erməni hərbi əsirləri geri qaytarmır.
Baş nazirin konfransda səsləndirdiyi bəzi fikirlərə Azərbaycan tərəfindən cavab gəlib. Bununla bağlı Xarici İşlər Nazirliyi açıqlama yayıb.
XİN nə deyib: Qeyd edilib ki, məhz prezident İlham Əliyev sülh sazişinin imzalanması təklifi ilə çıxış edib. Hətta, Azərbaycan tərəfi sazişin əsaslanmalı olduğu baza prinsiplərini də qarşı tərəfə təqdim edib. Əgər Azərbaycan Paşinyanın dediyi kimi müharibə istəsəydi, Ermənistanın 30 il ərzində yerlə yeksan etdiyi ərazilərin yenidən qurulması üçün işlər görməzdi.
