Gürcüstanın Daxili İşlər Nazirliyi Tbilisdə “Qürur həftəsi”çərçivəsində baş tutacaq tədbirlər müddətində LGBTQ+ fərdlərini qorumaq üçün “bütün lazımi tədbirləri” görəcəyini vəd edib. OC Media yazır ki, Daxili İşlər Nazirliyi ifrat sağçı Alt İnfo qrupunun hədələrindən sonra belə qərara gəlib. DİN-in yaydığı məlumatda polisin paytaxtda keçiriləcək qapalı tədbirlərin təhlükəsiz şəraitdə keçirilməsini təmin edəcəyi, hər bir şəxsin ifadə və toplaşma azadlığını qoruyacağı bildirilib:
Gürcüstanın Daxili İşlər Nazirliyi zorakılığın bütün formalarını pisləyir və Qürur Həftəsinə qarşı çıxan qrupları qanunlara əməl etməyə çağırır.
bəyanatda deyilir
“Tbilisi Pride” təşkilatının həm-direktoru Mariam Kvaratsxelia keçirdiyi mətbuat konfransında nazirlikdən aydın bəyanat vermələrini xahiş edib. O, eyni zamanda ötən il LGBTQ+ aktivistlərinə və jurnalistlərə qarşı zorakılığı təşkil edənlərin həbsini tələb edib:
Hökumətdən xahiş edirik ki, hər üç tədbirin və Tbilisidə “Qürur Həftəsi”nin hər bir iştirakçısının təhlükəsizliyini, eləcə də tədbirlərin keçiriləcəyi ərazilərdə və bütün şəhərdə ictimai asayişi qoruyacağını açıq şəkildə bəyan etsin.
deyə bildirib
OC Media-ya danışan “Tbilisi Pride” təşkilatının həm-direktoru Anna Subeliani əlavə edib ki, DİN-in bəyanatı “yaxşıya işarədir, lakin qeyri-kafidir”:
Ötən il iyulun 5-də zorakılığı törədənlər və bu il də eyni şeyi edəcəkləri ilə hədələyənlərin həbs edilməsi çox vacibdir. Biz indi bilirik ki, ifrat sağçı liderlər – Koka Morgoşia və Zurab Maxaradze dindirilib.
deyib
Narahatlığın səbəbi nədir: Ötən il 5 iyulda Tbilisidə planlaşdırılan qürur yürüşünü pozmaq üçün ifrat sağçı Alt İnfo qrupu zorakılıq kampaniyasına başlamışdı. Hücum nəticəsində 50-dən çox jurnalist xəsarət almışdı. Müdafiəni təmin etməkdən dəfələrlə imtina edən polis qətliamın qarşısını almaq üçün heç bir tədbir görməyib, zorakılığın təşkilatçıları həbs olunmayıb.
Hökumətin reaksiyası necədir: Bu il iyunun 22-sində (“Qürur Həftəsi”ndən 6 gün əvvəl) parlamentdə çıxışında baş nazir İrakli Qaribaşvili “Qürur yürüşü” təşkilatçılarının “milli dəyərlər və dövlət əleyhinə təxribat” törətdiklərini deyib. O, hətta yürüşü Gürcüstanın keçmiş prezidenti Mixail Saakaşvili təşkil etdiyini iddia edib. İyunun 27-də Gürcüstan hakimiyyəti zorakılıq çağırışları və təhdidlərlə bağlı təhqiqat başlatdıqlarını açıqlayıb. Lakin builki qürur festivalını pozacağını vəd etdikdən sonra Alt İnfo liderlərindən heç birinə qarşı ittiham irəli sürməyib.
Hücumlara beynəlxalq reaksiya: Aİ-yə namizəd olmaq istəyən Gürcüstana Avropa Komissiyasının tövsiyələrində 2021-ci ilin 5 iyulunda zorakılıq hadisələrini törədənlərin mühakimə olunmaması da yer alıb. Komissiyanın 17 noyabrda yaydığı məlumatda qeyd edilib ki, Gürcüstan həssas qrupların insan hüquqlarının müdafiəsini gücləndirmək, o cümlədən zorakılıq törədənləri və təhrikçiləri daha effektiv şəkildə məsuliyyətə cəlb etmək üçün hərəkətə keçməlidir.
“Qürur həftəsi”nə builki hazırlıq, etirazlar
LGBTQ+ hüquqlarını müdafiə edən “Tbilisi Pride” təşkilatı paytaxtda keçirməyi planlaşdırdığı “Qürur Həftəsi”nə film nümayişi ilə başlayıb. “Khidi” gecə klubunda gürcü rejissoru Elene Naverianinin homofobiyadan bəhs edən “Yaş qum” filmi nümayiş etdirilib. Tədbirdə ABŞ, İsveç, Hollandiya, Fransa və İsrail də daxil olmaqla bir çox Qərb ölkələrinin səfirləri iştirak edib və öz dəstəklərini təklif ediblər.
Bir qrup insan klubun yanından keçərək avtomobillərində siqnal verib, tədbirə etiraz ediblər. Polis nümayişin keçirildiyi gecə klubu və onun ətrafını ultra-mühafizəkar liderlər Quram Palavandişvili, Levan Çaçua, pravoslav keşiş David İsakadze və ifrat sağçı Alt-İnfo qrupunun üzvləri də daxil olmaqla, etirazçılardan qoruyub.
Ekstremist keşiş David İsakadenin rəhbərlik etdiyi Pravoslav Valideynlər Birliyi filmin nümayiş olunduğu “Khidi” klubundan LGBTQ+ üzvlərinə həmrəylik üçün göy qurşağı bayrağı asılan “Mziuri” kafesinə üz tutublar. Qrup üzvləri “Sodomitlərin leqallaşdırılması və təbliği soyqırımdır” yazılmış plakat tutaraq bayrağın kafedən götürülməsini və “homoaeksuallıq təbliğatına” qarşı qanunun qəbulunu tələb ediblər. Polis onların kafeyə yaxınlaşmasına mane olub.
Pravoslav Valideynlər Birliyi nədir: Bu qrup Gürcüstanın ən qədim dini qruplarından biri hesab olunur. Birlik üzvləri 2008-ci ildə Tbilisinin mərkəzində “Hallowen” bayramına, 2 ildən sonra isə Kavkasia kanalında canlı tok-şou proqramına hücum ediblər.
İftar sağçıların hücum hazırlığı
Alt İnfo qrupu bu il planlaşdırılan tədbirləri də pozacaqlarını bəyan ediblər və bununla bağlı hazırlıqlar görməyə başlayıblar. Qrup rəhbərləri planlaşdırılan “Qürur Həftəsi”ni pozmaq üçün bölgələrdən insanları Tbilisiyə gətirəcəklərini söyləyiblər. Alt İnfonun liderləri, o cümlədən onların siyasi partiyasının rəhbəri Zurab Maxaradze səfər xərclərinin ödənməsi üçün ianə istəyiblər. Maxaradze ölkənin 2 ən böyük bankı olan “Bank of Georgia” və “TBC” bankdakı hesablar haqda məlumatları açıqlayıb.
Bankların münasibəti necədir: Qrupun keçmişdəki zorakılıq aktlarına baxmayaraq, bankların heç biri ödənişləri qəbul etməkdən imtina etməyib. “Bank of Georgia”nın nümayəndəsi konkret cavab verməkdən imtina edib. Onlar müəyyən edilmiş qaydalara, Mərkəzi Bank tərəfindən müəyyən edilmiş daxili siyasət və prosedurlara əməl etdiklərini, müştəri tərəfindən qanun pozuntusu baş verərsə, bankın “adekvat cavab verəcəyini” əlavə ediblər. TBC Bank isə “Alt İnfo” qrupu ilə əlaqələri ilə bağlı sualları cavabsız qoyub.
