Qeyri-Hökumət Təşkilatlarına Dövlət Dəstəyi Agentliyinin “Şuşa İli”nə həsr etdiyi müsabiqənin nəticələri açıqlanıb. Qrant qalibləri iyunun 28-də Şuşa şəhərində elan olunub. Lakin müsabiqənin bütün detalları barədə məlumat qeyd edilməyib.
Müsabiqə haqda nə bilirik:
- Müsabiqə 7 apreldə elan edilib;
- 8 istiqamət üzrə 227 layihə təqdim olunub;
- 22 QHT- nin layihəsi seçilib.
Qaliblərə ayrılan vəsaitin içərisində ən yüksək məbləğ 40 min manatdır. Bu vəsaiti Səkinə Babayevanın rəhbəri olduğu “Azərbaycanda Qadın Sahibkarlığının İnkişafı Assosiasiyası” İctimai Birliyi “Qarabağ İncilərinin Avropa Sədası” layihəsinə görə qazanıb. Qrant alan layihələrdən bəzilərinin adları aşağıdakılardır:
- “Welcome to Shusha – Beynəlxalq Səyahət Bloger və İnflunserlərin Multikultural Forumu” – Addım Yaradıcı Gənclər Assosiasiyası İctimai Birliyi (35 min manat);
- “Xaricdə “Şuşa İli” çərçivəsində “Qarabağ Azərbaycandır” adlı konsertin təşkili” – Xan Şuşinski Fondu (30 min 150 manat)
- “Şuşanı tanıyaq, tanıdaq!” – Cəmiyyətin və Medianın İnkişafı İctimai Birliyi (25 min 260 manat)
- “Biz Şuşanın səfiriyik!” – İqtisadi və Sosial Araşdırmalara Yardım İctimai Birliyi ( 25 min manat);
- “Şuşanın 270 illiyi ilə əlaqədar Vikipediyada 270 mövzu üzrə məqalələrin hazırlanması” – Azərbaycan Vikimedia Könüllüləri İctimai Birliyi (20 min manat).
Qaranlıq qalan məqamlar nədir: Seçilən layihələrin istiqaməti, kontenti, hansı hədəf qrupları üçün hazırlandığı barədə məlumatlar göstərilməyib.
