Gürcüstan polisi iyulun 2-də baş tutan “Qürur Festivalı”na mane olmağa çalışan ifrat sağçı Alt info qrupunun bir neçə lideri də daxil olmaqla bir çox şəxsi ayın 1-də həbs edib. OC Medianın məlumatına əsasən, həbslər “Qürur Festivalı”nın başlamasına təxminən 15 saat qalmış baş verib.
Kimlər həbs edilib: Alt İnfo qrupunun üzvləri söyləyib ki, həbs edilənlər arasında qrupun 2 tanınmış lideri – Zurab Maxaradze, İrakli Martinenko, həmçinin tanınmış ifrat sağçı fəal Quram Palavandişvili və oğlu da var.
Alt İnfonun digər tanınmış lideri Şota Martinenko isə öz telekanalında canlı yayım edərək tərəfdarlarını festival keçirilən gün küçələrə çıxmağa səsləyib, birbaşa zorakılığa çağırış edib:
Biz hökumətin Qərblə razılığa gəldiyini bilirik. Hər kəsi çölə çıxmağa çağırırıq. Ölkəni bu iyrənclərin əlində qoymayaq.
deyib
O, etiraz etmək üçün hər kəsi Tbilisiyə səsləyib.
Festival günü nə baş verib: İyulun 2-də səhər tezdən Alt İnfo qrupunun üzvləri, eləcə də bir neçə gürcü pravoslav keşişi Tbilisidə festivalın keçirildiyi Mtasminda dağında məkanı zəbt etməyə, tədbiri pozmağa cəhd ediblər. Onların içəri girməsinə mane olan polis qrup rəhbərləri də daxil olmaqla 26 nəfəri həbs edib.
Mtastmindada şənlik keçirilən zaman ifrat sağçı Alt İnfo qrupunun minlərlə üzvü və tərəfdarı Tbilisi küçələrinə axın ediblər. Parlament binasının qarşısına toplaşanlar NATO və Aİ bayraqlarını, eləcə də göy qurşağı bayraqları cırararaq yandırıblar. Hətta parlament binasının qarşısında toplaşan etirazçılardan biri üzərinə benzin tökərək özünü yandırıb. Ətrafdakılar dərhal onu fəvvarəyə atıblar. Həmin şəxs təcili yardım maşını ilə xəstəxanaya çatdırılıb.
Festival necə yekunlaşıb: “Tbilisi Pride” təşkilatının həm-direktoru Mariam Kvaratskelia tədbirin uğurla başa çatdığını bildirib. O, polisin tədbirə nəzarət etdiyini, zorakılıq cəhdlərinin qarşısının alındığını söyləyib:
Mən bunu alqışlayıram. Biz gördük ki, ‘Qürur Tədbirləri’ni qorumaq üçün siyasi iradə olarsa, onlar bunu çox yaxşı bacarar.
deyə bildirib
Kvaratskelia vurğulayıb ki, gələcəkdə də polisin belə davranacağına ümid edir.
