Ermənistanın Səhiyyə Nazirliyi əqli çatışmazlığı olan şəxslərin könüllü qısırlaşdırılması ilə bağlı 1990-cı illərdə qəbul olunan qanuna dəyişiklik edilməsini təklif edib. Bununla nazirlik məhkəmələrə həmin şəxslərin qısırlaşdırılması ilə bağlı qərar qəbul etmə səlahiyyəti verilməsini istəyib. OC Media yazır ki, qanun layihəsi avqustadək ictimaiyyətin müzakirəsinə çıxarılacaq, daha sonra hökumətə təqdim olunacaq.
Qanun layihəsində nə deyilir: Səhiyyə Nazirliyinin təklif etdiyi düzəlişlər məhkəmələrə “qabiliyyətsiz” insanların sterilizasiyası barədə göstəriş verməyə icazə verir. 1998-ci il qanunu isə fərdlərin könüllü sterilizasiyası ilə bağlı müddəaları təmin edirdi.
Bundan başqa, təklif olunan layihədə “qabiliyyətsizlik” müəyyən edilmir. Vazektomiya və boruların bağlanması vasitəsilə tibbi sterilizasiyanın “nisbətən geri dönməz müdaxilə” olduğu bildirilir, müraciət edənlərə müvafiq məlumat, qərar vermək üçün vaxtın verilməsinin vacibliyi vurğulanır.
“Doğru və ya yanlış, insan özü qərar verir”
Əlilliyi olan şəxslərin hüquqlarını müdafiə edən “Disability Rights Agenda” təşkilatından Muşeg Hovsepyan hazırkı ilkin qanunun “problemli” olmasına baxmayaraq, ən azından insanlara zərər vermədiyini deyib. O əlavə edib ki, təklif olunan dəyişikliklər qanunun könüllülük mahiyyətini dəyişir və sözügedən şəxsdən başqa heç kimin əlilliyi olan şəxsin uşaq sahibi olub-olmamasına qərar vermək hüququ yoxdur:
Əlilliyi olmayan insanlar bu cür qərarları özləri verə bilirlərsə, deməli, əlilliyi olan şəxslər də belə edə bilərlər. Doğru və ya yanlış, insan özü qərar verir.
deyib
Hovsepyan vurğulayıb ki, bir insana “qabiliyyətsiz” damğası vurmaq artıq insan hüquqlarının pozulması deməkdir. O, əlilliyi olan şəxslərə lazımi dəstək almaları üçün kömək etməyi və onlara könüllü qısırlaşdırılmanın hansı nəticələrə gətirib çıxara biləcəyini “sadə və əlçatan üsulda” izah etməyi təklif edib:
Heç vaxt onların yerinə qərar verməyin. Bu haqda nə qəyyum, nə məhkəmə, nə də başqa qurum qərar verə bilməz.
bildirib
Səhiyyə Nazirliyi isə Hovsepyanın təkliflərini nəzərə alacaqlarını və qanun layihəsinə düzəlişlər ediləcəyini bildirib.
