Azərbaycanlı araşdırmaçı jurnalist Əfqan Muxtarlının 2017-ci ildə Tbilisidə oğurlanaraq Bakıya göndərilməsi ilə bağlı yeni iddialar səsləndirilib. Bu haqda Gürcüstan Dövlət Təhlükəsizlik Xidmətinin keçmiş rəis müavini, hazırda həbsdə olan Soso Qoqaşvili məktubunda yazıb.
Məktubda nə deyilir: Qoqoşvili iddia edib ki, 5 il əvvəl Əfqan Muxtarlı hakim “Gürcü Arzusu” partiyasının qurucusu, milyarder Bidzina İvanişvilinin əmri ilə oğurlanıb. O, vurğulayıb ki, bu iş üzrə bütün sübutlar Gürcüstan DTX-nin Əməliyyat-Texniki İdarəsi tərəfindən məhv edilib.
Ə.Muxtarlı iddia haqda nə deyib: Gürcüstanın “Mtvari” xəbər portalı jurnalistin fikirlərini öyrənib. O, oğurlanmasında Gürcüstanın Təhlükəsizlik Xidməti, Müdafiə Nazirliyi, Sərhəd və Gömrük Xidmətinin iştirak etdiyini deyib:
Oğurlanmağımı şəxsən daxili işlər naziri Vaxtanq Qomelauri planlaşdırmışdı. Bundan o vaxtkı baş nazir Giorgi Kvirikaşvilinin də xəbəri var idi. Vəkillə məsləhətləşdikdən sonra necə davam edəcəyimizə qərar verəcəyik. Biz mütləq çalışacağıq ki, Soso Qoqaşvilini mənim oğurluğumla bağlı prokurorluğa ifadə versin.
əlavə edib
Jurnalist onu da qeyd edib ki, oğurlanmasına görə Azərbaycan tərəfi Gürcüstanın təhlükəsizlik xidmətinə 3 milyon dollar ödəyib, bu barədə ona Azərbaycandan məlumat verilib.
Jurnalist necə həbs olunmuşdu: 2014-ci ildən ailəsi ilə Gürcüstanda yaşayan Ə.Muxtarlı 2017-ci ilin mayında Gürcüstanın təhlükəsizlik qüvvələri tərəfindən oğurlanaraq Azərbaycana təhvil verilib. Azərbaycanın rəsmi orqanları jurnalistin sərhədi qanunsuz keçdiyi və üzərində 10 min avro nağd pul tapıldığını bəyan edib. Ona qarşı dövlət sərhədini qanunsuz olaraq keçmə və qaçaqmalçılıq maddələri ilə cinayət işi açılıb.
Hansı maddələrlə cəza almışdı: O, 6 il müddətinə azadlıqdan məhrum edilib, 2020-ci il martın 17-də isə azadlığa buraxılıb. Bundan sonra jurnalist Almaniyaya ailəsinin yanına mühacirət edib.
