Avqustun 13-dən 20-dək Bakı, Şəki və Lənkəran şəhərlərində III Sevil Beynəlxalq Qadın Sənədli Film Festivalı (Sevil BQSFF) keçiriləcək. Builki şüarı “Bizdən sizə kim düşə?” olan festival hər 3 bölgədə eyni anda baş tutacaq.
Festival haqda nə bilirik:
- Festivalın bu il üçün mövzusu qadınları sərhədləyən stereotiplərlə və onların qırılmasıdır;
- Məqsəd sənədli filmlər və müzakirələr vasitəsilə gender məsələlərini ölkədə diqqət mərkəzində saxlamaqdır.
- Seçki komissiyası tərəfindən seçilən filmlər, ən yaxşı uzunmetrajlı film, ən yaxşı qısametrajlı sənədli film və yerli sənədli film kateqoriyası üzrə yarışacaqlar.
- Çoxsaylı yerli və beynəlxalq uzun, qısametrajlı sənədli film, masterklasslar, panel müzakirələr, filmlərdən sonra müzakirə sessiyaları olacaq.
Qeyd edilib ki, BQSFF Almaniyanın “goEast” film festivalı ilə əməkdaşlığa başlayıb və “Sevilfest”-in qalib rejissoru “goEast” tərəfindən təşkil edilən “East-West Talent Lab”da iştirak haqqı qazanacaq.
Sevil BQSFF nədir: Adını Cəfər Cabbarlının Azərbaycanda qadın azadlığını təmsil edən “Sevil” pyesindən götürən festival 2020-ci ilin sentyabrında fəaliyyətə başlayıb. Məqsədi sənədli filmlər vasitəsi ilə gender məsələlərinə diqqət çəkməkdir. BQSFF artıq 3-cü dəfədir festival təşkil edir. Ötən il keçirilən festivalın mövzusu qadın ölümlərinə həsr olunmuşdu, və məqsəd ölkədə son illərdə daha da artan qadın cinayətlərinə diqqət çəkmək idi.
