Mediada LGBTIQ+ qarşı münasibəti araşdıran “QueeRadar” təşəbbüs qrupu ötən ilə dair hesabat hazırlayıb. 2021-ci ilin yanvarından dekabra qədər olan dövrü əhatə edən araşdırmada LGBTIQ+lara qarşı törədilən cinayətlər, hadisələrlə yanaşı onlayn mediada işlədilən nifrət nitqinin monitorinqi də yer alıb.
Araşdırma necə aparılıb: Geniş auditoriyası olan, sosial-siyasi mövzuların dərc edildiyi 23 media orqanından nifrət ifadələri yer alan 501 material nəzərdən keçirilib. Nəticələrə görə, materialların böyük qismi qərəzli olub:
- qərəzli – 62.5%
- neytral – 37.5%
Hesabatda qeyd edilib ki, LGBTIQ+lardan bəhs edən məqalə və xəbərlərdə “üzdəniraq”, “mavi”, “azlıqlar”, “petux” kimi alçaldıcı ifadələrdən istifadə olunub.
“Kütləvi informasiya vasitələri hökumətə yaxın siyasətçi və məşhurlara queerfob bəyanatlar səsləndirmək üçün geniş imkan yaradıb. Monitorinq nəticələri göstərib ki, medianı nifrət nitqi, eləcə də LGBTIQ+ları hədəfə çevirmək üçün vasitə kimi istifadə edənlər müxtəlif sahələrdə çalışan fiqurlardır” – hesabatda deyilir. Monitorinqin nəticələri göstərir ki, belə bəyanatlar səsləndirənlər arasında əksəriyyət jurnalistlərdir:
- jurnalist – 51.35%
- politoloq – 8.11%
- siyasi partiya rəsmisi – 8.11%
- şair/yazıçı – 8.11%
- deputat – 5.41%
Hesabatda vurğulanır ki, nifrət xarakterli ifadələr səsləndirənlərin ümumilikdə 2.7 %-i psixoloq, hüquq müdafiəçisi, bloqer, dinşünas, şou-biznes nümayəndəsi və astroloqlar olub.
Yekun nəticə necədir: Araşdırmalar göstərib ki, mediada Azərbaycandakı LGBTIQ+ların vəziyyətinə və hüquqlarına toxunan materialların sayı daha azdır, media qurumları ayrıseçkilik xarakterli nifrət nitqi materiallarına geniş yer verib. Bununla yanaşı, ölkə mediasında LGBTIQ+ların haqq və azadlıqlar kontekstində işıqlandırılması əvvəlki illərə görə daha çoxdur. Hesabat müəllifləri hesab edir ki, bunun səbəbi LGBTIQ+ aktivizmi, müxtəlif təşəbbüs qruplarının fəaliyyətləridir.
