Azərbaycan Müdafiə Nazirliyi bu gün Laçında bir hərbçinin həlak olduğu barədə rəsmi məlumat yayıb. Məlumatda deyilir ki, Rusiya Sülhməramlılarının yerləşdiyi ərazidəki erməni silahlılarının açdığı intensiv atəş nəticəsində əsgər Anar Kazımov aldığı güllə yarasından həlak olub.
Anar Kazımov kimdir: 2004-cü il təvəllüdlü Anar Kazımov aprel ayında hərbi xidmətə çağırılıb. O, Şəmkir rayonunda doğulduğu Qaracəmirli kəndində dəfn olunacaq.
Hadisəyə rəsmi reaksiya: Faktla bağlı Qubadlı Hərbi Prokurorluğunda Cinayət Məcəlləsinin 120.2.12-ci (milli, irqi, dini ədavət və ya düşmənçilik niyyəti ilə adam öldürmə) maddəsi ilə cinayət işi başlanıb.
Azərbaycan Xarici İşlər Nazirliyi isə hadisəni pisləyən bəyanat yayıb. Bəyanatda deyilir ki, Ermənistan tərəfi üçtərəfli razılaşmanı pozur və münasibətlərin normallaşması istiqamətində səylərə xələl gətirir.
Ermənistan nə deyir: Azadlıq Radiosunun Ermənistan bürosunun yaydığı məlumata görə, tanınmamış Dağlıq Qarabağ Respublikasının Müdafiə Nazirliyi bu gün təmas xəttində Azərbaycanın PUA-lardan istifadə edib və nəticədə 1 əsgər həlak olub, 8 hərbçi yaralanıb.
Ermənistan Müdafiə Nazirliyinin mətbuat katibi Aram Torosyan isə Ermənistan-Azərbaycan sərhəddində heç bir gərginlik olmadığını açıqlayıb.
Report İnformasiya Agentliyi axşam saatlarında Azərbaycanın Rusiya Sülhməramlılarının yerləşdiyi ərazidəki erməni silahlılarına qarşı “antiterror əməliyyatı”nın keçirildiyini yayıb. Müdafiə Nazirliyinin hələ ki, təsdiqləmədiyi məlumatda bildirilir ki, qarşı tərəfdən 4 nəfər ölüb, 15 nəfər yaralanıb.
Əməliyyat zamanı həm də sığınacaq və mövqelərə zərbələr endirilib, silah-sursat anbarları sıradan çıxarılıb. Hərbi əməliyyatla bağlı Report İnformasiya Agentliyi “Caliber”ə istinadən məlumat yayıb ki, Kəlbəcər rayonunun Heyvalı kəndində artilleriya hərbi hissəsi və azı bir post dağıdılıb.
Armenpress.am yazır ki, tanınmamış Dağlıq Qarabağ Respublikasının prezidenti Arayik Arutyunyan qismən hərbi səfərbərlik elan edib.
