Tbilisi Meriyası və Acariya bölgəsinin Turizm Departementi ukraynalı qaçqınların otellərdə yerləşdirilməsi və yemək üçün verilən maliyyəni dayandırıb. Belə ki, martın əvvəlində Gürcüstan hökuməti ilkin olaraq onlara 1 ay müvəqqəti mənzillə təmin edəcəyini açıqlayıb. Bu proqramın müddəti bir neçə dəfə uzadıldıqdan sonra Ukrayna vətəndaşlarının avqustun 1-də otelləri tərk etməli olduqları bildirilib.
OC Medianın məqaləsində qeyd olunur ki, Batumidə yerləşən ukraynalı qaçqınlardan olan qadın jurnalistlərə gedəcək yerləri olmadığını deyib:
Gürcüstanda getməyə yeri olmayan çox sayda ukraynalı qaçqın var. Biz kobudluq etmək istəmirik, amma uşaqlarımızla hara gedəcəyimizi bilmirik.
deyə bildirib
Digər qadın isə Batumiyə Ukraynanın Mariupol şəhərindən qızı və nəvəsi ilə birgə qaçdığını bildirib:
Dörd aydır ki, buradayam. Pulumuz, getməyə heç bir yerimiz yoxdur. Xahiş edirik, bizə kömək edin.
söyləyib
Qadının sözlərinə görə, Batumidə qızını maşın vurub, müalicəyə xeyli xərcələri çıxdığı üçün yeni yaşayış yeri tapmağa pulları qalmayıb.
Qaçqınlara nə vəd edilib: Paytaxt meriyası Səhiyyə Nazirliyinin avqust ayından etibarən ukraynalı qaçqınların qayğısına qalacağını, həmçinin onlara digər güzəştlər ediləcəyini də açıqlayıb:
- Növbəti 3 ay üçün hər ailəyə 300 lari (təxmini 100 dollar) və hər bir ailə üzvünə isə 45 lari (təxmini 15 dollar) ödəniləcəcək.
- Ukraynalı qaçqınlar ictimai nəqliyyatdan, bələdiyyənin tabeliyində olan uşaq bağçalarından,incəsənət və idman məktəblərindən pulsuz istifadə etməyə davam edə biləcəklər.
Nə qədər xərc çəkilib: Tbilisi Meriyasının rəsmi açıqlamasına görə, paytaxtda 5 mindən çox ukraynalı qaçqının ev və qida ilə təmin olunub. Buna indiyədək 14 milyon lari (5 milyon dollar) xərclənib.
