Ermənistan Baş naziri Nikol Paşinyan Qarabağdakı Rusiya sülhməramlı missiyasının fəaliyyətinin dəqiqləşdirilməsini istəyir. Baş nazir rəsmi Moskvanın bununla bağlı lazımi addımları atmasını gözləyir.
Paşinyanın tələbinin səbəbi nədir: Ermənistan rəsmisi hesab edir ki, bölgədə sistemli xarakter daşıyan problemlər üzə çıxıb və buna görə də sülhməramlı missiyasının fəaliyyətini dəqiqləşdirmək mütləqdir. TASS yazır ki, baş nazir bu təkliflə avqustun 3-də baş verən gərginlikdən sonra çıxış edib. Onun sözlərinə görə, 2020-ci il dekabrın 11-də Xocavənd rayonunun Hintağlar və Çaylaqqala kəndlərinin, 2022-ci il martın 24-də isə Fərrux kəndinə nəzarətin Azərbaycan tərəfinə keçməyi və atəşkəs rejiminin mütəmadi pozulması onu narahat edir.
Sülhməramlıların fəaliyyətinin dəqiqləşdirilməsi onların bölgədə yerləşdirilməsi ilə paralel şəkildə aparılmalı idi. 9 noyabr 2020-ci il tarixli üçtərəfli bəyanatın 3-cü bəndində Dağlıq Qarabağda təmas xəttinin mövcud olduğu açıq şəkildə qeyd olunub. Məhz bu ərazi Rusiyanın Dağlıq Qarabağdakı sülhməramlı kontingentinin məsuliyyət zonası adlanır. Biz gözləyirik ki, təmas xəttini keçmək cəhdinin qarşısı Rusiya sülhməramlı kontingenti tərəfindən alınacaq və Azərbaycan bölmələri geri çəkiləcək.
Rusiya nə deyir: Paşinyanın sülhməramlılarla bağlı fikirlərinə Rusiya Xarici İşlər naziri Sergey Lavrov münasibət bildirib. TASS yazır ki, nazir indi bu barədə danışmağın onun üçün çətin olduğunu, çünki konkret təkliflərin olmadığını deyib.
Ermənistanın Baş nazirinin Rusiyanın Dağlıq Qarabağdakı sülhməramlı missiyasının detallarını dəqiqləşdirməklə bağlı müzakirəyə çıxarmaq istədiyi konkret təklifləri görməmişik. Azərbaycan, Rusiya və Ermənistan rəhbərləri arasında razılıq əldə olunan məsələlərlə bağlı təbii ki, bütün tərəflərin təklif irəli sürmək hüququ var. Lakin biz hələ ki, bunu görməmişik.
Nə baş verib: Azərbaycan Müdafiə Nazirliyinin avqustun 3-də yaydığı rəsmi məlumata görə, Laçında Azərbaycan Silahlı Qüvvələrinin əsgəri Anar Kazımov aldığı güllə yarasından həlak olub. Onun Rusiya Sülhməramlılarının yerləşdiyi ərazidəki erməni silahlılarının açdığı intensiv atəş nəticəsində yaralandığı bildirilib. Faktla bağlı Qubadlı Hərbi Prokurorluğunda Cinayət Məcəlləsinin 120.2.12-ci (milli, irqi, dini ədavət və ya düşmənçilik niyyəti ilə adam öldürmə) maddəsi ilə cinayət işi başlanıb.
Müdafiə Nazirliyinin gün ərzində yaydığı digər rəsmi məlumatda isə bildirilib ki, ərazidə Azərbaycan ordusu “Qisas” adı verilən antiterror əməliyyatı keçirib. Əməliyyat nəticəsində;
- Bir neçə döyüş mövqeyi dağıdılıb
- Keçmiş Ağdərə rayonunun Yuxarı Oratağ yaşayış məntəqəsindəki hərbi hissəyə havadan zərbə endirilib
- Qarşı tərəfdən canlı qüvvə həlak olub və yaralanıb
- Bir neçə D-30 haubitsası, hərbi nəqliyyat vasitələri və çoxlu sayda döyüş sursatları sıradan çıxarılıb.
