Türkiyənin pilotsuz uçuş aparatı istehsalçısı olan “Bayraktar” Ukraynada zavod tikintisinə başlayacaq. Bu barədə Ukraynanın Türkiyədəki səfiri Vasili Bodnar “RBK-Ukrayna”ya müsahibəsində deyib. Onun sözlərinə görə, təxminən bir həftə əvvəl hökumət ikitərəfli sazişi təsdiqləyib və ratifikasiya üçün parlamentə göndərib:
“Baykar” kompaniyasının sahibi artıq Ukraynada öz şirkətini qurub, zavodun inşası üçün torpaq sahəsi alıb və layihəni hazırlayıb. Bu tikinti təkcə siyasi deyil, həm də praktiki əhəmiyyət daşıyır. Çünki zavodda istehsal olunacaq modellərin əhəmiyyətli bir hissəsində Ukrayna istehsalı olan komponentlər olacaq.
deyə bildirib
Bodnar qeyd edib ki, komponentlər sırasında Ukrayna istehsalı olan mühərriklər, təkərlər və ya digər ehtiyat hissələri ola bilər.
Türkiyə Ukraynaya necə dəstək göstərib: Ukraynada orduya dəstək üçün Bayraktar PUA-ları almağa çalışan vətəndaşlar “Milli Bayraktar” adlı yardım kampaniyasına start vermişdi və qısa zamanda pul toplanmışdı. Lakin “Baykar Makina” pulu almaqdan imtina etdiyini və Ukraynaya 3 PUA bağışlayacağını bildirmişdi.
