Avqustun 14-ü Ermənistanın paytaxtında gərgin anlar yaşanıb. Belə ki, paytaxtda yerləşən iri ticarət mərkəzində partlayış olub, digər obyektlərdə bomba həyəcanı yaşanıb:
- Günorta saat 13:23 radələrində “Surmalu” ticarət mərkəzində partlayış, ardınca isə yanğın baş verib.
- Saat 16:46-da Fövqəladə Hallar Nazirliyinə Yerevanın bütün metrostansiyalarına, parlament binası, Müqəddəs Qriqor Lusavoriç kilsəsi, hərbi və mülki obyektlərə, ticarət mərkəzləri və küçələrdə bomba qoyulması barədə siqnal daxil olub.
FHN qeyd edilən heç bir ərazidə partlayıcı qurğu aşkar etməyib, saat 21:30-da metrostansiyaların işi bərpa olunub.
Partlayışla bağlı rəsmi açıqlama nədir: Hadisənin rəsmi səbəbi hələlik açıqlanmır. Lakin şahidlər partlayışın atəşfəşanlıq mağazasında baş verdiyini bildirirlər. Ermənistan Baş Prokurorluğunun sözçüsü Qor Abramyanın sözlərinə görə, partlayış faktı ilə bağlı cinayət işi açılıb, istintaq qrupu yaradılıb.
İtki nə qədərdir: Hadisə nəticəsində 6 nəfər həlak olub, 18 nəfər itkin düşənlərin axtarışı davam etdirilir. Ümumilikdə 61 nəfər xəstəxanaya yerləşdirilib.
